Cabugao, Ilocos Sur – Naaramidan ti slope protection (riprap) ti agsumbangir ti nakongkreto a kalsada a sumrek iti Sitio Paddual, Barangay Pug-os, Cabugao, Ilocos Sur babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. Segun kadagiti agindeg ditoy, nalubo ti dalan idi saan pay a naipangato ti kalsada ta ngamin nagkalungogan daytoy a paset ken dalan ti danum nangruna no panagtutudo. Babaen ti pannakaipangato ti kalsada ken pannakatarimaan ti culvert a pagayusan ti danum, napintasen ti panagdaliasat dagiti lumugar ditoy a buklen ti nasurok nga uppat a pulo a bubongan uray matutudo ti panawen.
Iti sabali a bangir, pinakongkreto met ti Gobierno Munisipal ti kalsada a sumrek iti Sitio Bessang, Barangay Pug-os iti asideg ti National Highway. Pinagyamanan dagiti ag-40 a kameng ti bubongan ditoy a purok iti Gobierno Munisipal ta napasayaat met ti dalanda ket manam-ayanda nga agdaliasat a rummuar ken sumrek iti purokda.
Ti pannakasemento ti Farm-to-market-road kadagiti barangay ket agtultuloy a programa ti LGU Cabugao nga idauluan ni Mayor Ediboy tapno matulongan dagiti mannalon a mangiruar kadagiti produktoda ken umaktibo ti ekonomia ti barangay ken ti Munisipalidad. # (Web In-Action)
No comments:
Post a Comment