Cabugao, Ilocos Sur – Naisayangkat ti Corn Husk Handicraft Training nga inlungalong ti DA-LGU Cabugao ken inaprobaran ti Gobierno Munisipal nga idauluan ni Mayor Edgardo “Ediboy” S. Cobangbang, Jr., mangrugi ita nga aldaw, Mayo 21, 2012 para iti 4-H Club ti uppat a barangays: Bonifacio, Cuancabal, Dardarat ken Arnap a nangbukel ti adda a 39 a kameng nga agsanay iti Cabugao Cultural and Sports Complex, Brgy. Rizal, Cabugao, Ilocos Sur.
Idauluan ni Mrs. Joenah G. Sevilleja, Municipal 4-Club Coordinator agraman ti staff ti DA-LGU a mangtarabay kadagiti agsanay ken kasta met ken ni Ms. Priscilla F. Abenoja, Trainor nga imbaon ti DA-Regional Office 1.
Imbatad ni Mr. Nereo S. Daproza, Municipal Corn Coordinator a kangrunaan a material a mausar iti nasao a handicraft training ket ti ukis ti mais ken partesna. Innayon ni Mr. Daproza a gagangay a maipakpakni ken mapuoran laeng ti pagukisan ti mais iti kallabes. Ngem natakuatan ti Ahensia ti DA ti usarna ket napataud ti livelihood program dagiti agtutubo ken interesado nga indibidual.
Agpaut ti lima nga aldaw ti training agsipud ta adu pay ti maisuro a maaramid a panguartaan dagiti agsanay, segun ken ni Trainor Priscilla F. Abenoja. # (Web In-Action)
No comments:
Post a Comment