I50 A MONOBLOC CHAIRS, INSAGUT NI HON. RONALD SINGSON ITI ARAGAN E/S

Cabugao, Ilocos Sur – Nangisagut ni Nag-Diputado Ronald V. Singson ti 150 a monobloc chairs iti Aragan Elementary School, segun kada Head Teacher Demy V. Peneyra ken Brgy. Captain Modesto B. Ronque.

Iti pannaki-amad ti Web In-Action, imbatad ni Mr. Bernard Briones, Grade VI Teacher a dakkel a tulong ti nainayon a tugaw para kadagiti agad-adal ken no adda okasion a mapasamak iti eskuela.

Insupusop met ni Brgy. Captain  Modesto B.  Ronque nga agtutunosda kadagiti mangisursuro nga idauluan ni Mr. Demy V. Peneyra  agraman ti PTA nga idauluan ni Mr. Larry Serrano   tapno agkiddawda pay iti mainayon a kasapulan iti pageskuelaan kangrunaan iti School Building kadagiti maseknan a tumulong  gapu iti umad-adu a bilang ti agbasa ken mainayon a mangisuro ditoy a pageskuelaan.

Ti Aragan Elementary School ket buklen ti uppat a mangisursuro iti agdama babaen ti pannarabay ni Mrs. Jocelyn V. Unabia, Teacher in Charge. Nupay kasta,  saklawen pay laeng  ni Mr. Demy V. Peneyra iti pagrebbenganna a kas Head Teacher  iti  nasao a pagadalan agraman iti Sisim Elementary School. # (Web In-Action)