Nangrugi daytoy nga aktibidadda idi Marso 20, 2013 ket nalpasdan ti Brgys. Bungro ken Pug-os.
Iti Barangay Turod, naaramid ti sensory evaluation iti Covered Court ti Cabugao National High School a nagpartisiparan ti 35 a respondents/farmers babaen ti panangtarabay dagiti pannakabagi ti Philrice nga idauluan ni Ms. Gem Corpuz ken iti DA-LGU Cabugao nga irepresentaran ni Municipal Rice Program Coordinator Mr. Nereo Somera Daproza.
Iti lamisaan, adda naisagana a kit a nakaikabilan ti nadumaduma a samples (innapuy ken bagas) a pagibasaran ti respondent iti isungbatna kadagiti saludsod a nailanad iti papel. Adda pay nayonna a saludsod a pakaseknan ti kinatao ti respondent iti baba ti papel.
Iti pannaki-amad ti Web In-Action, imbatad ni Ms. Gem Corpuz dagiti sumaganad a kangrunaan a panggep ti panagsukisok:
1. Mausarda ti datos iti National Cooperative Testing Project (NCT) para iti rekomendado a klase a bin-i ti pagay iti National Seed Industry Council (NSIC).
2. Ti NSIC ket daytoy ti paglasatan dagiti maisuplay a bin-i ti pagay kalpasan a maaprobaranda para iti merkado.
3. Ti NSIC ket daytoy pay ti pagtaudan ti klase dagiti Certified, Registered ken Foundation Seeds wenno bin-i a pagay a paaduen ken ilako dagiti seed companies kadagiti mannalon.
Segun iti PhilRice, ti ili ti Cabugao iti pakaipatungpalan daytoy a panagsukisok kas rainfed ecosystem area a maysa kadagiti napili a lokasion iti intero a pagilian.
Kadua ni Ms. Gem Corpuz da Oliver C. Soco, Panchito A. Tibayan, Jophine Ablaza ken Jonathan Cunanan, agpapada a pannakabagi ti Philrice.
Daytoy a gannuat ket paset ti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakaiyagpang dagiti maikanatad a Teknolohia iti panagtalon tapno agtultuloy a dumur-as ti kasasaad dagiti mayoridad nga umili ti Cabugao. # (Web In-Action)
No comments:
Post a Comment