BATANG TI BRGY. SAGAYADEN TI SOIL SAMPLE GATHERING

Cabugao, Ilocos Sur – Nagturong ti Grupo ti Soil Fertility Mapping Project of Cabugao nga idauluan ni Ms. Eugene A. Briones iti Barangay Sagayaden, Cabugao, Ilocos Sur tapno maituloy a maalaan dagiti sumarsaruno a barangay agingga a maileppas ti 33 a barangay ti ili ti  Cabugao.

Indauluan ni Sagayaden Farmer’s President Kagawad Rogelio Barlolong ken Kagawad Dominador Sayaboc dagiti mannalon a kimmuyog iti grupo a nangigannuat ti soil sample gathering. 
Kabayatanna, maiwaywayat met ti interbiu kadagiti maseknan a mannalon a nakaalaan ti soil sample  babaen ken ni Ms. Briones a kinadua  dagiti DA-LGU Staff.

Kanaig daytoy, nairapin ti pannakabakuna  dagiti sumagmamano  a bilang ti  aso dagiti lumugar ta adda a naikuyog ni Dr. Melvin G. Castro, DVM ken ni Miss Katherine Tapuro a katandem-na.

Sakbayna, nalpasen a napanan ti grupo a nagalaan ti soil samples  iti Brgy. Carusipan, Lipit, Arnap, Cuantacla, Cuancabal ken Alinaay. Imbatad ni Ms. Briones a naisubmiteren iti BSWM dagiti umuna a 50 a soil samples ngem dina pay la masinunuo no kaano a maanalisar dagitoy.

Agtultuloy met a monitoren/tarabayen  ni SBM Benedicto M. Savellano, Committee Chair on Agriculture ti nagapuanandan ken   ti grupo ken tumulong pay a mangaksion kadagiti tumaud a pakaseknanda  kabayatan ti  maipatpatungpal a  proyekto.

Ti Soil Fertility Mapping Project of Cabugao ket maysa a prayoridad a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. para kadagiti mannalon tapno maammuan  ti eksakto a kasapulan ti klase ti daga   a ganagan ken ti kaadu a mayusar tapno umadu ti maapit a mangparang-ay ti biag dagiti umili nga agpampannuray pay laeng iti Agrikultura. # (Web In-Action)