CORN PRODUCTION TI 4-H CLUB TI BRGY. BONIFACIO, NAGBALLIGI

Cabugao, Ilocos Sur – Ipampaneknek ita dagiti 4-H Club Members ti Brgy. Bonifacio nga idauluan da Ronald Soller ken Reyna Micah G. Sevilleja nga ikagumaananda a padakkelen ti Financial Assistance (P10,000)  nga inawat ti asosasionda  manipud  iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para kadagiti agtutubo  idi bulan ti Oktubre 2012.

Iti pannaki-amad ti Web In-Action iti Marso 11, 2013, imbatad ni Municipal 4-H Club Coordinator Mrs. Joenah G. Sevilleja a nangrenta ti asosasion ti  4-H Club   iti 1,000 metro-kuadrado a taltalon a masarakan  iti Brgy. Bonifacio a minulaanda ti Hybrid Yellow Corn (Dekalb) babaen iti Zero Tillage iti gatad a P1,000 nga abang ti daga  iti maysa a cropping season.

Innayon ni ti 4-H Club Coordinator nga iti P7,000 a nagpuonanda iti inputs, umabot  met ti P6,100 ti net income-da. Plano dagiti kameng nga usarenda pay laeng ti nasapulanda kadagiti aktibidadesda ken  pagpuonanda ti pundoda iti usarenda iti inadalda ti Catering and Commercial Cooking kastanto pay iti Mushroom Culture. # (Web In-Action)