CASH TRANSFER PROGRAM, INAWAT DAGITI 4 P’s BENEFICIARIES

Cabugao, Ilocos Sur – Naituding ti Marso 5, 2013 a panangawat dagiti recipients ti Pantawid Pamilyang Pilipino Program (4 P’s) dagiti kantidad a naituyang nga awaten ti tunggal maseknan a  benepisiario kadagiti 33 a barangays ti ili ti Cabugao iti Cabugao Cultural and Sports Complex, Brgy. Rizal, Cabugao, Ilocos Sur.

Mismo a dagiti pannakabagi ti DSWD Region ken Provincial Office kasta met iti Philippine Postal   Corporation Office ti nagiyawat kadagiti nadakamat a kantidad  a binayabay dagiti pannakabagi ti Municipal Social Welfare and Development Office (MSWDO) nga idauluan ni MSWDO  Officer Mrs. Lydia S. Gazmen.

Immuna a nagsarita ni Mrs. Gazmen iti naaramid  a programa ket pinalagipanna dagiti Beneficiaries iti panangusarda iti awatenda iti  nakairantaanna (Edukasion ken para iti healthcare ti annak)   ken iti natulnog  a panagtungpalda iti annuroten ken pagrebbengan nga ituyang ti linteg kadaytoy a programa.

Iti mensahe ni Mayor Edgardo “Ediboy” S. Cobangbang, Jr. iti panagsaritana, impeksana ti panagyaman ti Munisipio itoy a gannuat  ti Gobierno Nasional a panangtulong kadagiti marigrigat a pamilia. Innayonna a  nairanrana a maipatungpal daytoy  a  programa ti National Government ita ta batangda nga agserbi. Ingunamgunam  ni Mayor Ediboy kadagiti umawat ti gatad iti naurnos, natulnog ken nadisiplina koma a panangannongda iti pagrebbenganda tapno maipamatmat kadagiti agrebbeng iti ngato  a dagiti umili ti Cabugao ket ammoda a supapakan dagitoy babaen iti napintas a kababalin ken  kananakem  kadagiti sumangpet a pagsayaatan nga ipaay ti Gobierno Nasional  kadakuada.

Panagyaman ken agtultuloy a suporta ti komite iti Social Services para iti pagimbagan dagiti umili ti bugas ti mensahe ni SBM Dr. Carlito S. Pano, Committee Chair on Social Services  ken inramanna a dinakamat  da SBM Vicky S. Serna ken SBM Dr. Jemaima S. Tan-Yee a kakaduana iti nasao a Komite ti Konseho Munisipal.

Sistematiko ti pannakaurnos ti tunggal barangay/recipients  a nagturong kadagiti nairanta a lamisaan a papananda a  pagpirmaan sakbay  a naalada  dagiti kantidad nga inawatda.

Malaksid kadagiti Opisiales ti DSWD-Region/Provincial ken Philippine Postal Corporation a naitabuno, nakikaysa met iti nasao a taripnong da Vice Mayor Danny Q. Gazmen, SBM Josefina S. Vallejo, SBM Benedict M. Savellano, SBM Carlos Sison, Brgy. Captain Inocencio S. Sadac, Brgy. Captain Rogelio S. Siruno, ABC President Thaddeus U. Soller, Postmaster  Cesar Sivila, Opisiales ti barangay a nangbayabay kadagiti kabarangayanda, ken Personnel ti DSWD Municipal Link ken MSWDO-Cabugao nga idauluan ni  Mrs. Lydia S Gazmen.

Nagpaay nga Emcee ni SB Secretary Maxfel S. Suboc iti naaramid a programa. # (Web In-Action)