UMAD-ADU A VERMIWORMS, UMAD-ADU A VERMICOMPOST

Cabugao, Ilocos Sur – Agtultuloy nga asikasuen ti DA-LGU ti Vermiculture Program ti Munisipio nga imatonan da Mr. Obas Bill Y. Baclig, AT ken Mr. Nathaniel Galamgam  a masarakan ti pagtaraknan ti alinta (Bin) iti uneg ti Municipal Plant and Nursery, Brgy. Baclig, Cabugao, Ilocos Sur.

Iti pannaki-amad ti Web In-Action iti Marso 5, 2013, imbatad ni Mr. Galamgam a nagpaurnongda manen ti ipakanda (sinako a rugit ti baka) kadagiti alinta (Night Crawler)  tapno darasda nga umadu ken gumagetda nga agaramid ti organiko nga abuno. Innayonna  a nag-click ti Vermiculture Project  ni Mr. D. Reynold Sabio ket naipaayan manen ti sabali a 5 kilos a Vermiworms ket no adda pay  mannalon nga aginteresado nga agtaraken ti alinta ket suktanto  met la ni Mr. Sabio ti naalana tapno mayallatiw iti sabali  a mannalon.

Ti Vermiculture ket paset ti agtultuloy a  programa ti LGU-Cabugao nga idauluan ni Mayor Edgardo “Ediboy” S. Cobangbang, Jr.   ken  imatonan ti DA-LGU kas pangannurot ti Organic Agriculture  iti Departamento ti Agrikultura (DA) tapno maikabassit ti magastos dagiti mannalon iti panagmulada ket maingato ti matgedanda. # (Web In-Action)