NAKIPASET NI MAYOR EDIBOY ITI MITING TI FEDERATED FARMERS

Cabugao, Ilocos Sur – Nagmiting dagiti Opisiales ti Cabugao Federated Farmers Association nga idauluan ni Mr. Elmer Guerrero Bromeo ket kangrunaan a tinamingda ti panagsaganada iti  iparangda nga aktibidades    iti bennegda a mannalon iti masungad a 2013 Cabugao Ragsak Festival iti bulan ti Abril 2013. Naangay ti miting ti Pederasion  iti Senior Citizen’s Center,   Brgy. Rizal, Cabugao, Ilocos Sur.

Nakipaset ni Mayor Edgardo “Ediboy” S. Cobangbang, Jr.  kadagiti  Opisiales ti mannalon  ket pinagyamananna ti ipapaay dagitoy  a  tiempoda  a pannakigamuloda iti aktibidades ti masungad a panagpiesta ti ili.

Imbinsa pay ti Ama ti Ili iti pateg ti pannakaipaay ti kasapulan dagiti mannalon babaen iti madagdagus nga aksion ti Konseho Munisipal  yantangay dagiti met laeng mannalon ken umili  ti makagapu no apay a maiserbi  dagiti pundo ti RA 7171  nga ipapaay ti Gobierno Munisipal  para iti pagsayaatanda.

Impadamag pay ni Mayor Ediboy iti manamnama a  yuumay ni Diputado Ryan Luis V. Singson ditoy Cabugao inton Abril 20, 2013 a pangsarabuan  dagiti mannalon ken dadduma a sektor   iti maaramid a  Cutting of Ribbon Ceremony dagiti proyekto ditoy nga ili.

Binigbig pay ti Alkalde Munisipal dagiti kalikagum dagiti mannalon a kasapulanda kas iti hose ken ramit-agrikultura ket maaramid ti proseso ti pannakaited dagitoy babaen iti resolusion para iti  panagkiddawda.

Kanaig daytoy, inreport  ni Mr. Nereo S. Daproza, AT ken ni Mayor Ediboy  iti imatang dagiti Federation Officers  a maar-aramid ti  re-validation ti ID  dagiti mannalon  para iti sapasap a pannakaipaay kadagiti sumangbay a  subsidies  dagiti  mannalon. # (Web In-Action)