MAPALPALANGTO A SEEDLINGS, MAIMULANTO INTON KATUDONA

Cabugao, Ilocos Sur – Kas panagsagana ti umay a bulan ti panagtudona, irubrubuaten a palangtuen dagiti kameng ti DA-LGU nga idauluan ni Municipal Plant and Nursery Coordinator  Mr. Robert S. Savella, AT babaen ti pannakasibogda nga inaldaw gapu iti panagsig-at ti dam-eg a gubuayen ti idadateng ti kalgaw.

Kaaduan kadagiti napatanor a seedlings ti Manila Palm (Butsina), mahogany, mangga, logo, ken dadduma pay a seedlings a mangsustener ti programa ti Munisipio iti Clean and Green Program/Tree Planting kadagiti watershed, bakante a lote, igid ti karayan ken kalsada  kangrunaan kadagiti barangay.

Imbatad ni Mr. Savella nga umabot  ti 5,000 a seedlings ti Manila Palm (Butsina) ti napatan-ayda ngem naimulan ti dadduma babaen ti panagkalikagum dagiti Opisiales ti Barangay a nangiwayaten ti panag-Tree Planting-da iti agsumbangir a paset dagiti kalsadada.

Ti Municipal Plant and Nursery ket katinnulongna pay  ti Tanim Kalikasan, Inc., maysa nga NGO a kinatinnulag ti LGU-Cabugao nga idauluan ni Mayor Edgardo “Ediboy” S. Cobangbang, Jr. nga agtultuloy a mangsuportar iti programa ti panagmula ti kayo   babaen iti naiwayat ken   nasaknap a Tree Planting Activity/Plant Survivability Program a naigannuat  iti intero a Munisipalidad ti Cabugao iti kallabes ken iti masanguanan. # (Web Situational Report)