FINAL BRIEFING DAGITI TRAINEES ITI ELECTRICAL INSTALLATION, NAANGAY

Cabugao, Ilocos Sur – Naangay ti Final Briefing dagiti 19 a Trainees ti Electrical Installation and Maintenance nga inyusuat ti nagkakammayet nga Ahensia   iti  DSWD, TESDA ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. idi Marso 9, 2013 iti Municipal Conference Hall, Cabugao, Ilocos Sur.

Iti pannaki-amad ti Web In-Action itoy a petsa, imbatad ni Mr. Henry Combis, Trainor ti TESDA, a pinawaywayanda ti 5 nga aldaw ti 20 days a naituding a panagleppas ti training tapno maadalda ti  aminen  iti pakabuklan ti ababa a kurso agraman iti assessment period.

Insupusop pay ni Mr. Combis a maar-aramat dagiti electrical tools nga inted ni Mayor Ediboy para iti assessment iti nagapuanan dagiti Trainees. Maangay met ti Final Assessment-da inton Marso 12, 2013 no kaikarian ti Trainee  ti maikkan ti Certificate nga i-award ti TESDA.

Naglektiur  ni Mr. Daniel Acosta, TESDA Trainor a kaduana da Mr. Combis ken  ni Mr. Mike Bryan Bilog, TESDA Trainor.

Umabot iti 19 dagiti Trainees a makaileppas/nakailayon manipud  iti 20 a bilang ti nangrugi a  nag-Trainee, segun pay ken ni Trainor Combis.

Ti pannakaipakat daytoy a programa a sinuporatan  ti LGU’s  a pannakasanay dagiti interesado nga agtutubo ket paset ti panangipaay kadakuada ti Gobierno Munisipal nga idauluan ni Mayor Ediboy iti  oportunidad nga agsayaat ti kasasaadda babaen iti pannakaipaay ti kabaelan ken adal a mabalinda nga isapul a pagbiaganda. # (Web In-Action)