BUMAYBAYAG TI DAYO, UMAD-ADU TI PAGIMBAGAN NGA ITDENNA

Cabugao, Ilocos Sur – Iti pannaki-amad ti Web In-Action iti Marso 5, 2013, naammuan a  napusgan ti Cabugao Dayo a gumatangan ti LGU-Cabugao    iti  15 a  baka a taraknen dagiti   Top Performer Club ken Member ti 4-H Club ti Munisipalidad ti Cabugao. Imbatad ni Cabugao Cattle Trader’s Association  Treasurer Elpidio Mejia a maisagsaganan daytoy a gannuat tapno maipaayan met ti serbisio iti livestock dagiti agtutubo nga aggagar nga agtaraken a kas paset ti livelihood project ti asosasionda.

Insupusop ni Municipal 4-H Club Coordinator  Mrs. Joenah G. Sevilleja a napunduan daytoy a proyekto babaen ti Performance Challenge Fund  iti panangilungalong ni SBM Benedict M. Savellano, Committee Chair on Agriculture ken iti panangaprobar ni Mayor Edgardo “Ediboy” S. Cobangbang, Jr.

Daytoy a gannuat  ti LGU-Cabugao ket paset ti pannakaited ti livelihood projects kadagiti agtutubo ken  mangitunda   iti pannakasursuroda a makigamulo iti pannakapatan-ay ti  industria ti livestock sector  a maysa kadagiti ikalkalikagum ti Gobierno Munisipal a padur-asen ken maisaknap  iti benneg ti Agrikultura. # (Web Situational Report)