Tuesday, March 12, 2013

MANGITAL-O DAGITI PROYEKTO A NAGUN-OD TI BRGY. DARDARAT

Cabugao, Ilocos Sur – Iti panagbisita ti Web In-Action, dandanin  agkakamang  ti sementado a kalsada iti Barangay Dardarat, Cabugao, Ilocos Sur iti panangidaulo ni Brgy. Captain Danny S. Garcia, Premiado a Kapitan iti  ili ti Cabugao.

Kanaig daytoy, nainagoraran itay nabiit  ti baro a Barangay Hall ken nakongkreto a kalsada babaen kada Diputado Ryan Luis V. Singson, First District, Ilocos Sur  ken ni Mayor Edgardo “Ediboy” S. Cobangbang, Jr. nga inimatangan dagiti Kapitanes ti ili, lumugar ken sangaili iti naangay a seremonia.



Imbatad met ni nag-Kapitan Fermin S. Sesuca   a napintas ti panagkibin ti Konseho ti Barangay ken dagiti mannalon nga idauluanna ket agdindinnanggay   iti agrikultura ken iti pagikanan a mangitag-ay ti ekonomia ti barangay ken panaglatakda kadagiti pammadayaw a nagun-odda.


Malaksid kadagiti proyekto a pang-agrikultura a nagun-odda iti agdama, insupusop  met ni Kagawad Fabian Solatre a kangrunaan a pagimbagan ita a  masagsagrapda  ket dagiti proyekto nga ipapaay ti BFAR-Region 1.


“Mangpairut ti panagkakalugaranmi ket ti Dardarat Tulongan Savings Association a ditoy ket kameng pay ni Kapitan Danny. Saanen a masapul nga agsursor ti utangen ti agkasapulan. Mairamankami met kadagiti proyekto a masagrap ti barangay-mi. Dios ti agngina, Apo,” inyebkas met ni Mr. Federico Solis, Presidente ti Association.



“Agyamankami kada Apo Mayor ta napasayaat dagiti kalsadami. Napintas pay ti Barangay Hall-mi. Nagasatkami a bumarangay ta napintas ti pannakitunos dagiti opisialesmi kadagiti pangpangulo iti ngato a mangited ti adu a proyekto,” impeksa met ni Mrs. Dominga Garcia ken Ms. Estang Solar nga agnaed iti asideg ti kasemsemento a barangay road.


Pagyamananda met unay  iti LGU-Cabugao nga idauluan ni Mayor Ediboy kasta met ni Diputado Ryan agraman kadagiti Opisiales ti BFAR   kadagiti   sumangbay a proyekto ken  agtultuloy a masagsagrap a pagimbagan dagiti kabarangayanda iti Barangay Dardarat. # (Web In-Action)


 
 
 
 

No comments:

Post a Comment