Cabugao, Ilocos Sur – Naangay ti 74th Closing Exercises ti Lipit-Cuancabal Elementary School nga idauluan ni Mr. Edwin C. Duque, Head Teacher iti Brgy. Lipit, Cabugao, Ilocos Sur idi Marso 18, 2013.
Iti programa, immuna ti Grand March dagiti naggraduar a kaduada dagiti nagannak, Opisiales ti barangay ken ili, bisita ken Guest of Honor and Speaker. Naisaruno ti Presentation of the Candidates for Graduation babaen ken ni Mrs. Gemma A. Ponce, Petition for the Confirmation of the Candidates for Graduation ni Mr. Edwin C. Duque, Head Teacher. Kinompirmaran ida ni Mrs. Julia Cayso, Principal ti Cuantacla E/S dagiti 23 a naggraduar.
Iti mensahe ni Mrs. Cayso, kinaritna dagiti nagturpos ken nagannak nga itultuloyda ti agbasa dagiti ubbing iti nangatngato a tukad tapno magaw-atda ti balligi ti biag. Imbinsana ti pateg ti adal a nasamay a kalasag iti agbalin a lider iti masakbayan.
Napnuan met ti kaipapanan ti Mensahe ni Miss Aveliza P. Tapangco, Guest of Honor and Speaker. Dinakamatna a saan a tubeng ti kinapobre iti panagballigi ti adal. Determinasion ken panagtalek iti Dios ti inlatakna a kaepektibuan a sanggirna iti biag iti pananggaw-atna ti balligi iti adalna.
Naiyawag ni Lester Paul R. Sivila, anak ni Cabugao Postmaster Cesar Sivila a nakagun-od ti Umuna a Promedio kadagiti nagturpos.
Inyukkor ni Mrs. Jerlie S. Cobangbang a nangibagi ken ni Mayor Edgardo “Ediboy” S. Cobangbang, Jr. dagiti indonar ni Mayor Ediboy a medalia para iti Highest Achiever of the Year ken Leadership Award. Napusgan pay ni Ma’am Jerlie a nangiyukkor ken ni Lester ti Gold Medal nga impaay ni Congressman Ryan Luis V. Singson iti kangatuan a nagturpos.
Kalpasan ti Awarding of Medals, Certificates and Ribbons to the Outstanding Graduates, naisaganad ti pannakaisab-it dagiti ribbon ken medalia dagiti undergraduate honor pupils manipud iti Kindergarten agingga iti Grade V Pupils babaen kadagiti nagannak.
Addaan ti 23 nga ubbing a naballigi a nagturpos iti adalda iti nasao a pagadalan iti dayta nga aldaw. # (Web In-Action)
No comments:
Post a Comment