Cabugao, Ilocos Sur – Kagiddan ti pannakaaramid ti Slope Protection iti igid ti baybay, naileppas met ti pannakakongkreto ti paset ti kalsada ti Purok Sadiri, Brgy. Pug-os, Cabugao, Ilocos Sur.Segun ken ni Municipal Engineer Crescencio C. Formoso, nasemento ti nasao a paset ti kalsada babaen ti panangilungalong ni Mayor Edgardo “Ediboy” S. Cobangbang, Jr. ken napunduan babaen ti Municipal Share iti RA 7171.
Iti pannaki-amad ti Web In-Action kadagiti bumarangay a makadaliasat kadaytoy a kalsada ket imbatadda a nangipaay ti pagnam-ayanda iti papanda kadagiti pagtatalonanda iti laud nga abagatan ti barangay.
Impeksa pay dagiti pumurok ken bumarangay iti panagyamanda iti Gobierno Lokal itoy a pagsayaatan ti barangayda.
Ti pannakapapintas dagiti kalsada ti barangay ken sitios ket prayoridad a programa ti Gobierno Munisipal babaen ti panangidaulo ni Mayor Ediboy tapno mapapardas ti pannakairuar ti produkto dagiti mannalon ken napintas ti panagdaliasat dagiti umili a makawidawid kadagitoy a pagdalanan. # (Web In-Action)
No comments:
Post a Comment