2-DAY SEMINAR TI CABUGAO DepED, NAAWIS NI MAYOR EDIBOY

Cabugao, Ilocos Sur – Naangay ti 2 – Day Seminar/Training  ti Cabugao DepED District idi Agosto 14-15, 2014 iti Social Hall, Cabugao South Central School, Cabugao, Ilocos Sur a nagatendaran dagiti mangisursuro ken dadaulo ti 26 a pageskuelaan ti Cabugao, Ilocos Sur.

Iti Day 1, Agosto 14, 2014 (Huebes), naangay ti panagadalda (Lektiur ken Demonstration)  maipapan iti District Roll Out Training Seminar on the Conduct of the New Physical Fitness Test a maisuro kadagiti Teachers tapno agbalinda a nasiglat nga agisuro iti Physical Fitness.

Iti Day 2, Agosto 15, 2014, naangay ti Closing Program iti malem kadayta nga aldaw ket nasangailida  ni Mayor Edgardo “Ediboy” S. Cobangbang, Jr.

Nangipaay ti Mensahe ni Mayor Ediboy. Kimmablaaw ken nagyaman iti natimpuyog a pannakaigannuat ti seminar iti Cabugao South Central School Social Hall. 

Anag ti Mensahe ni Mayor Ediboy ket pagyamyamananna iti amin a mangisursuro iti agtultuloy a pannakidinnanggayda iti Munisipio para iti pannakaipatungpal kadagiti programa iti Edukasion a mangmuli iti napintas a pagbanagan dagiti agad-adal a  mainayon a naresponsable nga umili iti masakbayan.

Imbinsa ti Alkalde Munisipal  ti pateg ti sports ken physical fitness a mainaig a pagrebbengan ken akem dagiti mangisursuro tapno agbalin a nasalun-at dagiti ub-ubbing. Imbinsa pay  ti Ama ti Ili ti pateg ti pannakaaramid  ti Sports Ground iti asideg ti pageskuelaan a mabalin a pannakasentro iti pagdidinnayoan dagiti agad-adal iti masanguanan nga aldaw.

Dinayaw  ti Ama ti Ili iti maipakpakita a gapuanan/regget  dagiti mangisursuro a katinnulong ti Gobierno Lokal a mangidur-as ti benneg ti Edukasion iti ili ti Cabugao, Ilocos Sur.

Naisaganad dagiti naaramid nga Impression dagiti pannakabagi ti 10 a Grupo dagiti nagseminar. Pinagyamananda iti naballigi a resulta ti  dua nga aldaw a panagsanayda kadagiti isuroda kadagiti ubbing ken  pinagyamananda met iti Ama ti ili iti agtultuloy a pannakidinnanggayna kasta metten iti Konseho Munisipal  kadagiti programa ken pakaseknan a mangidur-as kadagiti pageskuelaan ti ili.  # (Web In-Action)