Monday, August 4, 2014

WORLD CLASS ATHLETES, NAGIYAWIDDA TI PAMMADAYAW

Cabugao, Ilocos Sur – Imbagian da Ms. Jamela Mae Paligutan ken ni Angelika Camille Reintar ti Pagilian ti Pilipinas  iti naaramid  nga 8th World Taekwondo Culture Expo a naangay idiay Muju-Gun, Jeollabuk-Do, South Korea (Muju County, North Jeolla Province, South Korea) idi Hulio 4-9, 2014.


Napadayawan ditoy ilida  dagitoy dua nga atleta kalpasan iti Flag Raising Ceremony ti Pamilia LGU-Cabugao iti Agosto 4, 2014 ket inyawat ni Mayor Edgardo ”Ediboy” S. Cobangbang, Jr.  dagiti Certificate of Commendation-da ken  binayabay ni Vice Mayor Deogracias Jose Victorino H. Savellano agraman dagiti kameng ti Sangguniang Bayan nga isuda SB Member Danilo Q. Gazmen; SBM Dr. Jemaima S. Tan-Yee; SBM Vicky S. Serna; SBM Jayhan Alcid-Tan; SBM Josefina S. Vallejo; SBM Benedicto M. Savellano, ken ni SBM Atty. Bryan Jett S. Pano iti pannakabigbig da Ms. Paligutan ken ni Ms. Reintar.

Sakbayna, nakisalip ni Ms. Paligutan iti Poomsae ken Kyorugi Events ket inyalatna ti Gold Medal nga agpadpada  iti dua nga events ken nagun-odna ti taekwondo jins iti intero a lubong.

Iti sabali a bangir, iti  daytoy met laeng nga events ti nakisalipan ni Ms. Reintar ket nagun-odna met ti Gold Medal ken Silver Medal kas panagsaganadda.


Gapu kadagitoy a nagun-od dagiti atleta ket pinadayawan ti Sangguniang Bayan ti ili a Cabugao, Ilocos Sur  ida babaen iti  nabukel a Resolution No. 28 A ken B, Series of  2014  idi Hulio 21, 2014  a Regular Session ti Konseho Munisipal maigapu iti Outstanding Achievements a nagun-od dagitoy nga atleta a nangidayaw kadakuada  iti sabali a pagilian, ditoy pagilianda ken iti ilida a Cabugao, Ilocos Sur.

Imbasa ni SB Secretary Maxfel S. Suboc dagiti  dua a resolusion sakbay nga inyawat  ni Mayor Ediboy kadagiti atleta agraman dagiti komendasion a naited kadakuada.

Iti panagsarita ni Mayor Ediboy kalpasan a mayawatna dagiti pakakitaan ti pannakapadayawda ket impeksana ti ragsakna kadagitoy a gapuanan ken pammigbig a nagun-od dagitoy nga atleta iti benneg ti sports. Innayon ti Ama ti Ili  a mairamanda kadagiti mailungalong a pagsaysayaatan daytoy a kita ti  sports tapno maitandudo met dagiti sumarsaruno nga agduyos kadaytoy a paglaingan ti Atleta. # (Text: Joed Sajonia/Photoby: Darrel Luzano)

No comments:

Post a Comment