Cabugao, Ilocos Sur – Iti pannaki-amad ti Web In-Action idi Agosto 4, 2014, imbaga ni Municipal Rice Program Coordinator Nereo S. Daproza, AT, a kaaduanen kadagiti mannalon (820 a bilangda) iti manggapun a makatalon iti Wet Season 2014 (Hunio-Nobiembre) ta naparuaren ti ubbog a pagpannurayanda a mainayon a padanumda nangruna iti tangkig ken gapu pay iti masansan a panagtudona iti napigsa.
Innayon Municipal Rice Program Coordinator Nereo S. Daproza, AT a matutoren dagtiti mannalon iti pannakaiturong ti padanumanda ta adda dagiti makinaria nga inted ti LGU-Cabugao kasta metten dagiti hose a pagsisinnublatanda nga usaren tapno mapasay-akanda ti talonda uray iti masakupan ti adda ti irigasionna ken adda bubon wenno small farm reservoir-da.
Iti masakupan ti adda padanumna kas iti irigasion, kuna ni Mr. Daproza nga umaboten ti 1,553 Ektarias ti naraepanen idinto ta 550 Ektarias ti naraepan iti Rainfed Lowland.
Kabayatanna, impakaammo ti Municipal Rice Program Coordinator ti Cabugao nga agtultuloy latta iti panagbisitana kadagiti barangay ken iti disso dagiti Techno-Demo ti Hybrid ken Certified Seeds agraman iti Seed Production Area tapno maiwanwanna met dagiti mannalon (Cooperators) ken kakaduana a Destino a Teknisian ken aktual a maalana ti eksakto a bilang dagiti makatalon.
Dagitoy nga aksion ken inisiatiba ket maigapu iti agtultuloy a suporta ti LGU-Cabugao iti Agrikultura iti liderato ni Mayor Edgardo “Ediboy” S. Cobangbang, Jr. tapno maragpat latta ti “Rice Sufficiency Status” para kadagiti umili ti Cabugao, Ilocos Sur. # (Web Situational Report)
No comments:
Post a Comment