Wednesday, August 6, 2014

MUNICIPAL e-LIBRARY, BINISITA NI MAYOR EDIBOY

Cabugao, Ilocos Sur – Binisita ni Mayor Edgardo “Ediboy” S. Cobangbang, Jr. ti uneg ti eLibrary itay nabiit a kaduana ti maysa a bisita ti Munisipio.  


Naluktan ti Municipal e-Library idi Hunio 3, 2014 a masarakan iti dayaen ti Municipal Hall  ket maus-usar ita  kadagiti estudiante iti panagsukisokda (research) ken kasta pay kadagiti adalenda ken dadduma a kasapulanda nga impormasion.

Daytoy a baro a pasilidad ti Munisipio ket proyekto a nagbuligan a naipasdek babaen iti panagkammayet  ti LGU-Cabugao nga idauluan ni Mayor Ediboy ken dagiti Asosasion ti Cabugaoenians nga agnanaeden iti ballasiw-taaw. 


Iti pannakiuman ti Web in-Action kadagiti estudiante ken Researchers nga umay agsuksukisok iti Mac Computers (uppat) ket ipekpeksada ti  panagyamanda iti LGU-Cabugao ta adda daytoy a naipasdek a  moderno a ramit a pakanam-ayanda a mangtakuat kadagiti adalenda ken mangnayon pay ti kaammuan ken kabaelanda.

Kabayatanna, dagiti naituyang nga annuroten iti eLibrary ket dagiti sumaganad:

1. Ti Cabugao eLibrary ket usaren ti amin nga agindeg iti ili a Cabugao nangruna kadagiti estudiante, mangisursuro ken dagiti agsukisok (Researcher).


2. Aglukat manipud 8:00 a.m. agingga iti 5:00 p.m. manipud iti aldaw ti Lunes agingga iti Biyernes ken 1:00 pm agingga iti 5:00 pm iti aldaw ti Sabado ken Domingo.

3. Amin a kliente ket umuna nga agrehistroda  iti Logbook ken mangipakitada  iti Identification Card (ID) apaman a sumrekda  iti pasdek.

4. Mausar dagiti Computers (Mac Computer  Brand,  Latest) a libre ngem saan a mausar para iti Social Network Sites (Facebook, Twitter, Instagram, etc.); kasta met iti Video Sites (Youtube, etc.) ken ON LINE GAMING. # (Web In-Action)

No comments:

Post a Comment