Cabugao, Ilocos Sur – Maang-angay ti Lektiur maipapan iti Disaster Preparedness kadagiti kameng ti Pantawid Pamilyang Pilipino Program (4 P’s) kadagiti nakaeskediul a papanan dagiti kameng ti Municipal Link- 4 P’s ti Cabugao, Ilocos Sur kas ita a bulan ti Agosto 2014.
Segun ken ni Fire Marshal Elmer C. Acapuyan, Bureau of Fire Protection, Cabugao a nakikoordinarda kadagiti paguummongan dagiti 4 P’s Members a mitmitingen met dagiti Municipal Link maipapan iti Disaster Preparedness ket ditoyen a nayonanda dagiti mayadal maipapan iti naannad a panagusaran ti apuy, koriente ken iti kandela iti inaldaw a kasapulan a panagbiag dagiti umili.
Innayon ti Fire Marshal nga ar-aramidenda daytoy tapno mamaksimisa ti orasda ken dagiti bumarangay yantangay maymaysa met ti topiko nga aw-awitenda kadagiti padada nga Ahensia nga idanonda kadagiti 4 P’s Members.
Imbatad met da Ms. Juliet Madriaga ken ni Ms. Rosemarie Pespes, agpada nga empleado ti Cabugao 4 P’s Municipal Link – DSWD a nadardarasda a mobilisaren dagiti 4 P’s Members ditoy nga ili ket gapu ta naannayas ti pannakaipagna ti programa ket arapaapda a gun-oden iti Opisinada ti Umuna a Puesto iti panagtungpal ti obligasion ti 4 P’s iti intero a Probinsia ti Ilocos Sur.
Madama ita a mapmapanda kadagiti barangay tapno ummongenda dagiti kameng ti 4 P’s ket aglektiur da Miss Aida S. Cueto, Municipal Link & Focal Person kasta metten ken ni Ms. Jessie Ann O. Tabut ken kakaduada iti Municipal Link Staff ti Municipal Operation’s Office (MOO) - 4 P’s Cabugao ken kumuyog a kameng ti dadduma nga Ahensia.
Kada bulan ket maysa a topiko/pakaseknan ti tamingenda kadagiti miembros ti 4 P’s tapno sistematiko ken naurnos ti panangagsepda iti maiyadal.
Dagitoy nga aksion ken inisiatiba ket paset iti nasaknap a pannakaipakat ti pro-poor program babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. babaen iti itutulong dagiti maseknan nga Ahensia/Opisina a mangipatungpal ti pakabuklan ti programa. # (Web Situational Report)
No comments:
Post a Comment