Friday, August 15, 2014

SEED PRODUCTION, 7 EKTARIA TI NAMULAAN ITI WET SEASON 2014

Cabugao, Ilocos Sur – Umabot ti pito ektaria (7 Has.) ti namulaan iti Foundation ken Registered Seeds a pamataudan manen  ti bin-i a mailako kadagiti mannalon tapno makaapitda iti 6-7 a Tonelada ti kada ektaria ti pagay nangruna no panawen ti Wet Season a magustuan dagitoy a klase ti pagay gapu ta supisiente ti suplay ti padanum.

Iti pannakiuman ti Web In-Action iti Agosto 14, 2014, imbatad ni Mr. Nereo S. Daproza, AT, Municipal Rice Program Coordinator nga ag-pito ektaria (7 Hectares) ti kalawa ti namulaan manen para iti Seed Production ditoy ili ti Cabugao ita a Wet Season 2014 (Hunio-Nobiembre).

Indauluan da  Mr. Bonifacio Siababa ti Brgy. Sagayaden, Cabugao, Ilocos Sur a nagmula iti NSIC Rc 288 – 3.5 Ektaria ken ni Mr. Allan Serna ti Brgy. Baclig, Cabugao, Ilocos Sur a nangmula ti 3.5 Ektaria iti nadumaduma a variety ti pagay   a masarakan ti pagtatalonanda kadagiti nadakamat a lugarda met laeng. 

Dagiti klase  ti immulada ket dagiti sumaganad a Rice Variety and Seed Class: NSIC Rc 288 (Foundation Seeds); PSB Rc 82; NSIC Rc 298; NSIC ken NSIC Rc 160.
Manamnama a maapit dagitoy a maimula  inton  2nd, 3rd ken last week ti September 2014 kas panagsaganadda.

Innayon ni Mr. Daproza a kalpasan a maapit dagitoy, agdalan iti proseso iti pannakaamiris dagiti bukel no a mailako kadagiti agkasapulan ti bin-i a pagay. Kaaduan a gumatgatang  ket dagiti mannalon ti Cabugao ken iti  kabangibang a lugar nga agus-usar iti hybrid/certified  a bin-i  iti panagtalonda.

Insupusop pay ni Mr. Daproza a  kabayatan a patanoren ken patan-ayen dagiti Seed Growers  dagitoy a naimula a pang-bin-i, ket  pagrebbenganda iti DA-LGU Cabugao a monitoren/mangisuro  ken mangtarabay kadagiti Seed Growers tapno masurotanda  met laeng ti  umisu nga addang iti panagpatanor ti bin-i a pagay. 

Daytoy a tignay a para iti naballigi a programa ti Agrikultura ket maiyannatup iti panggep ken direksion a kayat a tun-oyen  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangiturong kadagiti mannalon iti agtultuloy a  panagusarda kadagiti kabaruanan a bin-i  ken teknolohia tapno maingato ti bilang ti apitda  ken maingato ti matgedanda. # (Web In-Action)

No comments:

Post a Comment