Cabugao, Ilocos Sur – Iti pannakiuman ti Web In-Action ken ni General Manager Edgardo Carlos Mande ti Philippine Bamboo Foundation, Inc., ket imbatadna dagiti pammaliiwna ken dadduma pay a pakabuklan ti programada a nairaman a natratar iti maikadua nga aldaw ti seminar idi Agosto 8, 2014 kas iti sumaganad:
1.Epektibo nga erosion controller ti kawayan ket napintas a maimula kadagiti teppang nga asideg ti waig wenno naginduyas ti plastarna a daga.
2.Iti pannakaibusen ti kayo, mabalin a sandina ti kawayan (next timber) ta kas iti landok ti kakidser ti kawayan.
3.Napigsa pay a mausar a Pollution Control ta mamimpat a daras ti kalaingna nga agsagepsep iti carbondioxide ngem iti kayo.
4.Nangato ti Fiber ti kawayan nangruna iti rabongna kasta met iti sugar ken cellulose a mausar iti panagaramid ti biofuel, alcohol ken beer.
5.Mabalin nga usaren ti sabongna para iti Feedmill ket aglukmeg dagiti dinguen nangruna ti baboy a mataraken iti malaokan ti napapino a sabong ti kawayan.
6.Maibaga a maisalumina kadagiti kaaduan a mulmula maigapu ta adu ti usarna, mangted ti pagbiagan ti teknolohiana ken makaparnuay pay iti eco-tourism ken eco-friendly daytoy a mula iti daga.
Innayon ni Mr. Mande a posible a Base Resources dagiti kinawayanan ti ili a Cabugao, Ilocos Sur kas pangrugian ket iti pannakakombinsir dagiti nag-training a mangnayon ti imulada a kawayan ket makapataud iti bamboo plantation a mangparnuay ti industria iti daytoy a commodity iti tallo aginga iti uppat a tawen, segun pay ken ni Mr. Mande.
Iti 2nd day, timmarabay latta met ni Vice Governor DV Savellano kadagiti amin a nagseminar a napan iti disso ti Tree Park ti Barangay Baclig, Cabugao, Ilocos Sur a no sadino a ditoy ket naaramid ti Actual Demonstration iti Clearing iti puon ti kakawayanan a tumulong a mangpasayaat ti panagdakkel dagitoy. # (Web In-Action)
No comments:
Post a Comment