Friday, August 1, 2014

MDRRMC, NAKASAGANA A KANAYON

Cabugao, Ilocos Sur – Nakasagana ken agtigtignay ti puersa ti Municipal Disaster Risk Reduction  and Management Council (MDRRMC)-LGU Cabugao, Ilocos Sur    no  adda mamonitorda a kalamidad  iti Area of Responsibility-da. Iti parais ni Bagyo Inday iti pagilian ket nangibunga laeng    iti  napigsa a tudtudo  (Monsoon Rain) ditoy Ilokos a pabor ketdi kadagiti mannalon. 

Malaksid iti panagmonitor ti MDRRMC  iti National Highway a mapatta-patta a pakapasamakan ti masep-ak a sangsanga wenno matumba a kayo nga adda rukab ti unegna, mapanda  pay met  kadagiti calamity prone area (inland ken coastal area)  tapno obserbaranda ti epekto ti napigsa a tudo.

Daytoy a panagsagana ket naibasar  iti nairut a koordinasion ti MDRRMC kadagiti kabinuligna nga Opisina ken Ahensia ti Gobierno a masakupan met   iti PDRRMC-Ilocos Sur no adda nakaro a tudtudo, layus,  uram, aksidente ti lugan  ken kanaigna a didigra.

Iti panagmonitor  ti Web In-Action iti Agosto 1, 2014 napunno ti danum kadagiti Creeks gapu iti naurnong a danum iti surong ngem nadaras met laeng iti panages-esda gapu iti pannaka-dredgeda (nakuroban) ket nabulanos ti panagtaray dagiti danum a tumapuak iti waig.

Dagitoy nga aksion ken inisiatiba ket maigapu latta iti napartak a panangipatungpal ti pagrebbengan ti MDRRMC  nga agibagnos iti panawen ti napigsa a tudtudo tapno maprotektaran dagiti umili. # (Web Situational Report)

No comments:

Post a Comment