Wednesday, August 6, 2014

AKREDITASION TI SENIOR CITIZEN CENTER, MAISAGSAGANA

Cabugao, Ilocos Sur – Naaramid ti panagmiting  ti Cabugao Federation of Senior Citizens idi Agosto 5, 2014 iti pasdek ti Senior Citizen’s Center, Brgy. Rizal, Cabugao, Ilocos Sur a nagatendaran dagiti Opisiales ti Pederasion kadagiti barangay ti ili.


Segun ken ni Mr. Bonifacio Somera, Presidente, kangrunaan a trinatarda iti mapaspasangasangan nga Accreditation ti Cabugao Federated Senior Citizen’s  Center a maikammayet iti Federation of Senior Citizens of the Philippines - Regional ken National Office tapno mairamanda met kadagiti dadduma a programa ken benepisio a maited kadagiti nataengan nga ipaay/ilungalong  ti kangatuan a benneg ti asosasionda.

Innayon ni Mr. Somera idi kauman ti Web In-Action idi malem ti Agosto 5, 2014 nga adu ti kasapulan a papeles ti National Office isu nga adda gannuatda a mabingay ti walo a grupo dagiti Opisiales ti Cabugao Federated Senior Citizen nga ag-duty iti Senior Citizen’s  Center iti inaldaw a mangsango kadagiti umay a pannakabagi ti Regional ken National nga agkalap ti datos maipapan iti Senior Citizen ditoy Cabugao.


Innayon pay  ti Presidente a natratar  manen kadaytoy a mitingda iti pakaseknan dagiti Opisiales ken kameng, koleksion ti Saranay iti tunggal barangay. Maisamira met latta a tamingenda iti eskediulda  iti prayer  and vigil kadagiti pumusay a kamengda ken iti panagkolektada kadagiti Saranay Fees nangruna kadagiti saan pay a nakabayad.

Insupusop ni Mr. Somera nga agtultuloy latta ti pannakidanggayda iti Munispio a  mangtartarabay kadakuada iti pannakigamuloda iti Asosasionda  ken iti kagimongan. # (Web In-Action)

No comments:

Post a Comment