Cabugao, Ilocos Sur – Segun iti mapagdamagan iti DA-LGU Cabugao a nagun-od ti naitarget ken nasurokan ti kalawa a 2, 235 Ektaria a maraepan ita a Wet Season 2014 (Hunio-Nobiembre) ket dagitoy ti nairekord a pakabuklan daytoy a gapuanan dagiti mannalon a nagkair iti 2, 247 Ektarias a natalon:
1.Irrigated – 1,638 Ektaria ti natalon/naraepan.
2.Rainfed – 596 Ektaria ti natalon/naraepan.
3.Seed Production – 7 Ektaria eksakto ti naraepan.
4.Farmer’s Field School – 1.5 Ektaria ti naraepan.
5.Techno-Demo: 1 Ektaria, ti naraepan babaen ti DA-LGU; 3 Ektaria/LGU Bayer ken Demo-Research - .5 Ektaria ti naraepan.
Innayon ti DA-LGU nga idauluan ni Municipal Agriculturist Zenaida S. Andrada nga adda bilang a 4,383 a Mannalon (ID Holder) a mangsuksukay kadagitoy a namulaan.
Iti biang ti 596 Ektaria a Rainfed Area, kaaduan a makina a naipakunot iti bubon/nakali a water impounding ti mausar ken siphonic (maipakunot a hose ta nababa ti pakaipadanumanna a talon), ubbog ken tulong ti tudo iti nakatalonanda.
Iti met biang ti Irrigated, dakkel ti bentahe dagiti mannalon ditoy ta organisado ti panagpadanum ken panagtalonda ta masakupan ida ti Asosasion a saklaw ti NIA.
Kadagiti met Techno-Demo ti DA-LGU, mataming dagiti naimula ta as-asikasuen dagiti Techno-Demo Researcher iti Pribado ken iti DA-LGU nga ipatungpal.
Kabayatanna, maparegta dagiti mannalon babaen kadagiti DA-LGU Cabugao Technologists iti pannakataripato dagitoy a naimula tapno manamnama ti napintas a bilang ti maapit iti masanguanan.
Dagitoy nga aksion ken inisiatiba ket maigapu iti agtultuloy a pannakaipromot ti programa ti Agrikultura iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mamantener ti Rice Sufficiency Status para kadagiti umili ita a Tawen 2014. # (Web Situational Report)
No comments:
Post a Comment