Sunday, August 17, 2014

MASURNADAN TI CABUGAO DAYO 2014

Cabugao, Ilocos Sur – Iti pannaki-amad ti Web In-Action idi Agosto 16, 2014, imbatad ni Mr. Mariano Raciles, Jr., Presidente ti  Cabugao Livestock Traders Association nga agtultuloy ti pannakaiplastar dagiti ayup (kaaduan a nuang ken baka) babaen kadagiti Cattle Traders ken Koridor iti Cabugao Dayo iti  tunggal aldaw ti Sabado.


Impatalged ni Mr. Raciles a saan a maawanan ti ayup a maiplastar agsipud ta nagsaknapen ti damag uray iti kabangibang a dayo ken ili iti aktibo a panagdadayo ditoy Cabugao iti aldaw ti Sabado.

Imbatad met ni Municipal Livestock Coordinator Dr. Melvin G. Castro, DVM a mangtartarabay iti Dayo iti agtultuloy a pannakinaming ken panagkakammayetda kadagiti Cattle Traders ken Cabugao  Butcher’s  Association  iti panagsayaat ti Dayo gapu ta daytoy met ti maysa a pamataudanda iti matgedanda nga agserbi para iti bagida ken iti pamiliada. 

Kabayatanna, impakaammo ni Mr. Rudy Quileza, Treasurer ti Cabugao Livestock Traders Association  a puminpintas met ti matgedan ti Asosasion maigapu iti puonanda a P750,000 a nangrugian ti Cabugao Dayo. Innayon ni Mr. Quileza nga addan 1,700 a naaramid a transaksion (per ulo)  ti magatang/mailako a nuang ken baka ditoy uneg ti Cabugao Dayo manipud idi nangrugi a nakaurnonganen  ti P340,000 a natgedan ti Cabugao Dayo kadagitoy a Transaksiones dagiti Traders.

Dagitoy nga inisiatiba ket paset ti panangannurot iti Direktiba ni Mayor Edgardo “Ediboy” S. Cobangbang, Jr. a pannakaipamaysa iti pannakapadur-as ti Cabugao Dayo tapno masustener ti panggep ti Ama ti Ili a mangipaay iti agtultuloy ken produktibo a pagturongan ti industria ti livestock iti ili a Cabugao a makatulong kadaytoy a sektor ti Agrikultura. # (Web In-Action)

No comments:

Post a Comment