Wednesday, August 6, 2014

WATER RATIONING, KABAYATAN NGA UMAD-ADU TI UBBOG

Cabugao, Ilocos Sur – Iti pannakiuman ti Web In-Action iti Agosto 6, 2014,  imbatad dagiti  Waterworks Staff nga idauluan ni Superintendent Engr.  Nestor B. Somera a madama pay laeng ti iskemada (wagasda)  iti  water rationing iti sumagmamano a barangay a masakupan ti Cabugao Waterworks.

Impalgakda nga uray bumusbuslon  ti ubbog  a suplay a mausar gapu  ta nagtudtudo  ngem  maikonsidera latta ti “climate change adaptation”  kas kadagiti sumaganad a makagapu:

1.Makamat  ti agtartaray a danum iti Aquifer (kaunggan nga urat ti ubbog iti uneg ti daga) ta adu ti bubon iti aglawlaw   a mangkunnot ti ubbog nga usaren ti tao a pagpadanumda iti mulada ken dadduma pay a pakausaranda.

2.Apektado ti lokalidad iti napalpalabas a napasamak a ginggined segun iti na-sientipikuan a panagsukisok.

Kabayatanna, kankanayon met a mamonitor dagiti watershed area/pasilidad ti potable springs   a mangsakup iti Water Sources kas iti Magarang Spring Falls  idiay Barangay Cacadiran,  Cabugao, Ilocos Sur ken iti Roma-Kinalian Springs a masarakan iti Brgy. Maradodon ken Catucdaan kas panagsaganadda.

Insupusopda  nga adda pay adu a makagapu ngem kangrunaan ket iti panagbalbaliw ti panawen ta tinawen a mapasamak ti panagbaliw a patauden ti climate change. # (Web In-Action)

No comments:

Post a Comment