Cabugao, Ilocos Sur – Kalpasan a matarimaan iti pagdadangan ti danum, pagkuskosan ken pagpartian iti baboy, maigidgiddan a maaramid ti nasimpa a pagurnongan ti danum ken drainage ti Slaughterhouse iti likud.
Segun ken ni Dr. Melvin G. Castro, DVM, Municipal Livestock Inspector, a maipamaysa a ma-renovate ti pasilidad ti Slaughterhouse agsipud ta kabulbulonna met ti pannakamantener ti kinadalus, kinaurnos ken sanitasion kadaytoy a kangrunaan a paggapuan ti taraon dagiti umili iti karne.
Innayon ni Dr. Castro a napintaan metten ti likud ti pasdek tapno napintas met a mabuybuya ti pakabuklanna ken mamantener ti kinadalus ti pagipupokan ti dinguen sakbay a maparti kasta metten a maliklikan ti panagitilak ti narangrangkay a karne sakbay a maipanda iti Meat Stall iti NISTC Public Market.
Insupusop pay ni Dr. Castro a napasimpa pay iti pagurnongan ti danum a nausar iti likud ti pasilidad ken awan ti or-orasna a mapan isuna nga aginspeksion tapno siguraduenna a masurot dagiti proseso iti napintas a pannakaisagana kadagiti makonsumo a karne para iti sapasap.
Dagitoy nga aksion ken inisiatiba ket maigapu iti agtultuloy a panangilungalong ti Gobierno Munisipal iti pannakapasayaat ti pagpartian nga agresulta met laeng iti pagimbagan iti sapasap. # (Web In-Action)
No comments:
Post a Comment