Cabugao, Ilocos Sur – Agduduma ti naimula a kas iti repolio, broccoli, honeydew (murod), sutaw, ampalaya ken dadduma pay ti klasena a nateng ken cash crops iti uneg ti dua a Greenhouse ti LGU-Cabugao a masarakan iti Lote ti Munisipio iti Brgy. Baclig, Cabugao, Ilocos Sur kadaytoy a Wet Season 2014.
Ti maikatlo a pasdek iti Greenhouse ket naisangrat a pagpatubuan ti maisemilia a bukbukel, segun iti mapagdamagan iti DA-LGU Cabugao.
Impakaammo ni Municipal HVCDP Coordinator Mrs. Ester P. Aguimbag, AT, a naipasadia a pagmulaan ti nateng ken dadduma pay a cash crop dagiti Greenhouse ta daytoy ti akemda a mangalay-ay ti epekto ti init, tudo ken insekto tapno nabaludbod latta dagiti maipatulad a naimula a nateng.
Kabayatanna, inaldaw a masibsibogan, sa marukit, mapakalatkatan ken regular a maispreyan dagiti naimula nga agdududuma a nateng ken cash crops tapno napintas ti panagdakkel ken panagbungada iti masanguanan.
Agtultuloy met ti pannakikoordinar ti Opisina ti Municipal Agriculture Office (MAO) a makinaming iti DA-Provincial Office ken DA-RFO 1 iti pannakaruk-at dagiti mayataday a bukbukel ti nateng a para iti Off-Season Type.
Kabayatanna, maap-apiten ti naimula a sitaw ken paria babaen kadagiti pannakabagi ti DA-LGU Cabugao.
Dagitoy a Greenhouse ket nailungalong a mapaadda babaen iti agtultuloy a panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken iti DA-RFO 1 -(HVCDP) babaen kada DA OIC Regional Executive Director Valentin C. Perdido, Ph. D. ken ni DA-HVCDP Regional Coordinator Angel Padilla kasta metten iti Office of Agriculture (OPAG) - Ilocos Sur tapno agtultuloy a masursuruan dagiti umili nga agmula iti nateng a mangingato ti matgedan ken mangnayon iti pagtaraon dagiti umili. # (Web In-Action)
No comments:
Post a Comment