SEND-OFF PROGRAM AND PARTY NI TIO PROCESO, RINAMBAKAN TI CABUGAO SOUTH CS

Cabugao, Ilocos Sur – Indauluan ni Mrs. Melvie S. Sajonia, Principal II, Cabugao South Central School, Brgy. Bonifacio, Cabugao, Ilocos Sur  dagiti padana a mangisursuro ken Staff/Employees  ti Cabugao DepED District Office a nangrambak ti panagretiro ni Mr. Proceso C.  Cobangbang, Jr. a kas Administrative Aide iti nasao a pagadalan idi Hunio 15, 2014 ket naaramid ti send-off party a naisagut kenkuana  idiay Barangay Sabang, Cabugao, Ilocos Sur idi Agosto 25, 2014.

Naipaayan ti Send-off Party ni Tio Proceso (awag dagiti kasingedna)  maigapu iti naballigi a panagturposna iti termino  ti panagtrabahona iti pagadalan ti Cabugao South Central School iti unos ti 29 a tawen.

Nangrugi a nagtrabaho ni Tio Proceso idi Tawen 1985  a kas Administrative Aide ken nagretiro iti serbisio idi Disiembre 2013.

Nayanak ni Tio Proceso idiay  Quezon, Cabugao, Ilocos Sur idi Hulio 2,  1960  kadagiti agassawa a Loreto Cobangbang  ken ni Gervacia Cobangbang.

Nagbasa ti Elementaria ken nagturpos idiay Cabugao South Central School ken  High School idiay Cabugao Institute. Nagkolehio idiay NCBA, Manila idi Tawen 1980.

Nayasawa ken ni Monaliza G. Cobangbang  ken addaanda iti tallo  a bunga nga isuda Liezle Cobangbang-Sol; Chester Cobangbang ken ni May-ann Cobangbang-Larzon.

Imbatad ni Mrs. Melvie S. Sajonia, Principal II, Cabugao South Central School  a maysa  a nagaget ken mapagwadan nga empleado ti DepED- Cabugao ni Tio Proceso kabayatan iti panagserbisiona ditoy a pagadalan. # (Web In-Action)

SUGGESTED RETAIL PRICE DAGITI PRODUKTO, IMPAULOG TI DTI

Monitoren ti Department of Trade and Industry (DTI)  dagiti tagilako partikular iti Noche Buena Items tapno saan a masuitik dagiti Consumers nga aggatang iti iregaloda inton Paskua, daytoy ti impatalged ti maysa nga Opisial daytoy nga Ahensia itay nabiit.

Kinuna ni Senior Trade and Industry Specialist Amparo del Polanco a pinatulodanda dagiti Retailers dagiti establisimiento iti listaan ti presio dagiti tagilako tapno adda pagibatayan dagiti Consumers iti presio dagitoy iti panaggatangda.

Kinuna ni Polanco nga iti daytoy nga isusungad ti Paskua, adda manen ipaulog ti DTI a Suggested Retail Price (SRP) ti DTI a suroten dagiti pasdek-negosio tapno maammuan dagiti aggatang ti naituding a presio dagiti tagilako ket saanda a magundawayan.

Kinuna ti opisial a saan koma a makuna dagiti consumers a kellaat ti panagpangato ti presio dagiti tagilako nangruna iti masungad a Paskua 2014  agsipud ta adda SRP a naituding nga ipakat dagiti Retailers kadagiti tagilakoda. # (Adapted, Tawidnews)

ATHLETIC OVAL, MAISAGSAGANA PARA ITI PROVINCIAL MEET 2014

Cabugao, Ilocos Sur – Agtultuloy ti pannakaisagana   ti Track and Field Oval/Athletic Ground a proyekto ti LGU-Cabugao ken iti LGU-Probinsial a masarakan iti abagatan ti Cabugao South Central School, Brgy. Bonifacio. Cabugao, Ilocos Sur.

Ita pay, kaaduan nga umay agsansanay ket dagiti napili nga atleta a pannakabagi ti Unit 1 ken Unit V (Private School) a mangibagi iti mapaspasangasangan nga Schools Division Sports Competition (Provincial Meet) a maangay inton Disiembre 1-5, 2014 ditoy a disso.

Kanaig daytoy, naisagana metten dagiti kabarbaro a rubbermat a maikabil iti Cabugao Cultural and Sports Complex a mausar iti pagay-ayaman iti Taekwondo ken ti Gymnastics a daytoy ket nailungalong a pinataud ti LGU-Cabugao para kadaytoy nga event, segun ken ni Mr. Ronel M. Ubaldo, District PESS Coordinator.

Naigiddan  a naisagana dagiti dadduma pay a kasapulan a  pasilidad a para iti mapaspasangasangan nga Sports Competition. # (Web In-Action)

OPISIALES TI NEW CABUGAO ONION AND GARLIC, NAGMITING

Cabugao,, Ilocos Sur -  Naangay ti miting dagiti Opisiales/Kameng ti  New  Cabugao Onion and Garlic Growers Association nga idauluan ni Mr. Henry B. Saliganan itay nabiit iti 2nd Floor, Municipal Building, Cabugao, Ilocos Sur.

Segun ken ni Mrs. Ester P. Aguimbag, Municipal HVCDP Coordinator nga umaboten  ti 40 dagiti Miembros iti nasao nga Asosasion.

Kangrunaan a napagpapatangan ditoy a miting ket iti pannakaisagana ti panagmulada ti lasona ken bawang ken trinatarda iti napintas a pannakaipakat ti Recording  System-da.

Dagitoy nga aksion ken inisiatiba ket maigapu iti panangparegta ti LGU Cabugao nga idauluan ni Mayor Edgardo “Ediboy” S. Cobangbang, Jr. iti pannakaparegget ti industria ti nateng partikular ti bawang ken lasona ditoy Munisipalidad ti Cabugao tapno manayonan ti matgedan dagiti mannalon ken agtultuloy a maital-o ti kasasaad ti panagbiagda. # (Web In-Action)

UPDATE TI TRANSPORT GROUP-CISTODAI

Cabugao, Ilocos Sur – Naangay ti General Assembly Meeting ti Cabugao Ilocos Sur Tricycle Operators and Drivers Association, Inc. (CISTODAI) itay nabiit iti Cabugao Cultural and Sports Complex, Brgy. Rizal, Cabugao, Ilocos Sur.

Dagiti nataming ken napagkaykaysaan:

1.Pannakaipalubos laeng nga agpasada ti Traysikelan a makaala ti pammalubos “For Hire”  manipud iti Land Transportation Office (LTO).

2.Update ti Pinansial a kasasaad ti Asosasion.  Segun ken ni Mr. Dominador Andres, Presidente nga agdagup ti P30,000 ti naipa-loan kadagiti kameng ti bagi ti pundo; P77,000 ti nakadeposito ken P70,000 ti adda iti ikut ti Tesorero.

3.Umabot ti nasurok a sangaribu ti bilang ti Traysikelan ti ili ngem nasurok laeng a walo gasut ti agpaspasada a kompleto ti papelesna, segun ken ni Presidente Andres.

Manamnama nga iti pannakapainget ti pagannurotan a maibatay iti Municipal Tricycle Code wenno Ordinansa ket mapapardas a mapasayaat ti registration ti traysikelan ken kasta met iti serbisio nga itdenda iti sapasap, segun pay ken ni Mr. Andres.

Timmarabay iti nasao a miting ni ABC President,  Brgy. Captain Thaddeus “Teddy” U. Soller. # (Web In-Action)

TRAINEES TI FISH PROCESSING, NAANGAY TI PANAGTURPOSDA

Cabugao, Ilocos Sur -  Naangay ti Graduation dagiti Trainees ti Good Manufacturing Practices ken ti Fish Processing Skills Training a naangay iti  tallo nga aldaw (Nobiembre 25-26, 2014) a pinunduan daytoy ti SMERA (Small & Micro Enterprise Roving Academy) nga inlungalong ti Departmernt of Trade and Industry (DTI) ken ti LGU-Cabugao nga idauluan ni Mayor Edgardo “Ediboy” S. Cobangbang, Jr.  iti Covered Court with Concrete Pavement, Barangay Dardarat, Cabugao, Ilocos Sur  idi malem ti  Nobiembre 26, 2014.

Umabot ti 47 dagiti nag-training a buklen ti RIC Members/4 P’s Members iti pito a Coastal Barangays ti Munisipalidad.

Kalpasan ti Opening Prayer, National Anthem, Cabugao Hymn ken ti Dardarat Hymn ket nagsarita ni Brgy. Captain Charles F. Garcia ti Barangay Dardarat. Kimmablaaw ken nagyaman kadagiti nagturpos ken dagiti Opisiales ti DTI, UNP Trainors ken ti LGU-Cabugao ta naited daytoy a pribilehio a pannakasanay dagiti inna iti coastal barangays kadagiti matarusandanga obraen a mangnayon iti masapulanda.

Naisaganad ti panangipresentar ni Ms. Rozen Villa, UNP Trainor ti nagapuanan dagiti nag-training kas iti Fish Processing a version ti embotido, longganisa, lumpia, fishball, siomai ken ti shanghai a maaramid amin dagitoy babaen iti lasag ti ikan.

Naisaganad ti pannakaipresentar dagiti nag-training babaen ken ni DTI Officer Yolando Quiocho. Imbatad ni Mr. Quiocho nga agtutulag koma dagiti nagsanay iti maisaruno a kalikagumda a maidireher iti LGU sa maited iti DTI Office. Innayonna a no maikurrida ti inadalda ket makipasetdanto iti Kannawidan Festival ken maituladda idiay  Barangay Daclapan iti Meat Processing Project-da a maikkanda iti ramit ken makinaria a mangpadaras iti pannakaproseso dagiti produktoda.

Nagsarita ni SBM Atty. Bryan Jett S. Pano ket maysa kadagiti kaskenan nga aspeto a dinakamatna ti panangtulong kadakuada ti LGU iti pamuonan ken marketing iti aramidenda a produkto. Impasagepsepna a kasapulan laeng ti panagpursigeda iti programa ken tinnulong.

Naayat met a nangidagadag ni SBM Benedicto M. Savellano iti kalikagum dagiti nagsanay ket dinakamatna dagitoy a training a napateg a kas alternatibo  a pagbiagan dagiti agnaed iti igid ti baybay ken innayonna ti mainaig a programa ti TESDA ken ti Kapitolio iti pakaseknan ti Butchery. Insupusopna a di koma mauma dagiti nagsanay nga agkiddaw ta adda iti likudanda ti LGU a mangtarabay iti pannakaprobitsar dagiti serbisio a maited a kas kadagitoy a panagsanay.

Kalpasan ti naballigi nga Open Forum, nag-Closing Remarks ni Mrs. Lydia S. Gazmen, MSWD Officer. Pinagyamananna ti  DTI, UNP Trainors ken dagiti Opisiales ti Gobierno Lokal ti Cabugao a katinnarabayda a mangituloy kadagiti kakastoy a programa a mangidur-as ti kasasaad ti panagbiag dagiti Fisherfolks ti ili a  Cabugao. # (Web In-Action)

WATER RATIONING, MAIPATUNGPAL MANEN

Cabugao, Ilocos Sur – Iti pannakiuman ti Web In-Action iti Nobiembre 25, 2014,  imbatad dagiti Waterworks Staff nga idauluan ni Superintendent Engr.  Nestor B. Somera a madama manen ti iskemada (wagasda)  iti water rationing iti maseknan a barangay a masakupan ti Cabugao Waterworks.

Impalgakda a kumiddit ti ubbog  a suplay a mausar gapu  ta maikonsidera latta ti “climate change adaptation”  kas kadagiti sumaganad a makagapu:

1. Makamat  ti agtartaray a danum iti Aquifer (kaunggan nga urat ti ubbog iti uneg ti daga) ta adu ti bubon iti aglawlaw   a mangkunnot ti ubbog nga usaren ti tao a pagpadanumda iti mulada ken dadduma pay a pakausaranda.

2.  Apektado ti lokalidad iti napalpalabas a napasamak a ginggined segun iti na-sientipikuan a panagsukisok.

3. Maapektaran ti rukod ti  ubbog maigapu iti napigsa nga “evaporation” ti linabag ti suplay kadagiti tributario.

Kabayatanna, kankanayon met a mamonitor dagiti watershed area/pasilidad ti potable springs   a mangsakup iti Water Sources kas iti Magarang Spring Falls  idiay Barangay Cacadiran,  Cabugao, Ilocos Sur ken iti Roma-Kinalian Springs a masarakan iti Brgy. Maradodon ken Catucdaan kas panagsaganadda tapno makita latta ti pagan-annayasan ti linia ti suplay a danum. 

Insupusopda  nga adda pay adu a makagapu ngem kangrunaan ket iti panagbalbaliw ti panawen ta kada tawen nga adda mapasamak a  panagbaliw a maigapu iti climate change. # (Web In-Action)

GRADUATION TI PLUMBING NC II TRAINEES, NAANGAY

Cabugao, Ilocos Sur -  Naangay ti Graduation dagiti Trainees ti Plumbing NC II nga inesponsoran ti Technical Education and Skills Development Authority (TESDA)-Region 1 ken ti LGU-Cabugao nga idauluan ni Mayor Edgardo “Ediboy” S. Cobangbang Jr. a naangay iti Municipal Conference Building iti Nobiembre 26, 2014.

Kalpasan ti Prayer ken ti National Anthem, panglukat a sarita ti inakem ni SBM Danny Q. Gazmen.

Nangipaay ti Mensahe ni Mayor Edgardo “Ediboy” S. Cobangbang, Jr.  

Kimmablaaw kadagiti nagturpos iti nasao nga skills training a pakairamanan dagiti Opisiales ti TESDA ken dagiti Opisiales Lokal ti ili a timmarabay iti nadakamat a graduasion.

Imbinsa ni Mayor Ediboy ti pateg ti nasursuro dagiti Trainees ken ti benepisio nga itdenna para iti kabukbukodanda, iti pamiliada ken kadagiti kailianda a pangipakitaanda iti sayaat ken benepisio  dagitoy a nagun-odda a kaammuan para kadagiti sumarsaruno a programa nga iwayat  ti TESDA ditoy ili a Cabugao.

Impeksa pay ni Mayor Ediboy ti ragsakna iti napintas a naipakita a gapuanan ken kabaelan dagiti nag-training a nakagun-odan dagitoy iti 100% a resulta iti Assessment ti TESDA iti kabaelanda.

Innayon ti Ama ti ili ti panagyamanna kadagiti nag-Training ta ammoda a probitsaren dagiti serbisio nga ipaay ti National Government ket sisasagana latta met ti LGU a mangkomplementar kadagiti dadduma pay a kasapulan tapno maited ti naan-anay a serbisio iti pannakapadur-as ti kakastoy a panagsanay a mangpasayaat ti kasasaad dagiti maseknan nga umili.

Nagsarita met ni SBM Atty. Bryann Jett S. Pano, Committee Chair on Social Services ket kinablaawanna dagiti nagturpos. Innayon ti Konsehal nga ipadamagda koma  daytoy a gannuat kadagiti kabagian ken kabarangayanda tapno maikkanda met iti  gundaway nga agsanay ken maikkan ti sertipikasion nga aggapu iti TESDA nga usarenda iti pagsayaatanda.

Nagsarita met dagiti Opisiales ti TESDA a da Mr. Rolando Arellano, Assessor ken ni Mr. Arnel Gallardo, TESDA Provincial Officer. Kangrunaan nga anag ti mensaheda ti napintas a gapuanan ken kabaelan nga impakita  dagiti Trainees-da ditoy LGU-Cabugao.

Nangipaay ti Impression ni Mr. Chris Serdenia, Trainee. Kalpasan ti picture taking, nag-Closing Remarks ni MSWD Officer Mrs. Lydia S. Gazmen. Pinagyamananna ti TESDA ken ti sibubukel nga LGU Cabugao iti panagballigi daytoy a nayusuat a panagsanay ditoy ili a Cabugao.

Nakikaysa met da SBM Vicky S. Serna ken ni  SBM Benedicto M. Savellano iti nasao a panagtitipon. # (Web In-Action)

PRE-NATAL KEN BAKUNA TI UBBING, AGTULTULOY ITI RHU

Cabugao, Ilocos Sur – Malaksid kadagiti kadawyan nga an-annayen ken sagubanit dagiti maipapaagas iti Rural Health Unit (RHU)-Cabugao, kaaduanna met ita ti mapan ag-pre natal check-up dagiti masikog tapno maipasigurado ti napintas a kasasaad ti panagpasngayda inton madanonan ti kabulananda. Manamnama nga iti nasayud a koordinasion dagiti masikog kadagiti agrebbeng iti RHU ket ma-update ti rekord-da a kasapulan pay ti Lying-in Clinic a naipasadia a paganakan dagiti nadanonanen ti kabulananda.

Kanaig daytoy, inaldaw latta met iti pannakaipan dagiti ubbing/ maladaga para iti pannakabakunada kadagiti mayataday a pangprebentar ti sakit, segun ken ni Dr. Bernardino P. De Gracia,  Municipal Health Officer ti MHO-Cabugao. Maikkan ti agtultuloy nga  importansia daytoy a serbisio babaen iti agtultuloy a panangilungalong dagiti maseknan a Medical Personnel iti MHO-RHU Cabugao kasta metten  iti Sangguniang Bayan nga idauluan ni Health Committee Chair SBM Atty. Bryann Jett S. Pano.

Kangrunaanna, dagitoy nga inisiatiba ket resulta iti pannakaitandudo ti salun-at iti amin nga umili babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)

PANAGLALAMIIS, ASIKASUEN TI SALUN-AT

Cabugao, Ilocos Sur – iti pannakiuman ti Web In-Action idi Nobiembre 25, 2014, impakaammo ni Dr. Bernardino P. De Gracia,  Municipal Health Officer ti MHO-Cabugao a natapoganen ti panaglalamiis a bulbulan ket kasapulan ita  ti agtultuloy a panagdaldalus iti bagi ken iti ikub ti arubayan ken pagtaengan, regular a panagwatwat ken pannangan ti mayad-adu a prutas ken natnateng.

Innayon ni Dr. De Gracia a no nasustansia dagiti maipapauneg ket naandur ti bagi nga agibtur iti agbaliwbaliw a klima a pagaayat met dagiti dadduma  a sintomas ti sakit a pagtaudan.

Kabayatanna, dinayaw ti Doktor ti Ili iti panangipaay dagiti Opisiales ti Ili agraman iti Barangay ken dagiti Health Implementers iti agtultuloy nga importansia dagiti programa a kas iti Kalusugan Pangkalahatan Program ken Clean and Green Program  nga akemen dagiti pannakabagi ti salun-at iti barangay ken iti naregget a pannakaipakat ti pagsayaatan ti nutrision ken panagmulmula ti nateng kadagiti 4 P’s ken dadduma pay nga asosasion iti uneg ti barangay.

Insupusop pay ti Doktor ti Salun-at a dagitoy nga inisiatiba ket makatulong unay iti pannakamantener ti salun-at ken sanitasion a mangparagsak iti kaamaan dagiti umili nangruna kadagiti agnanaed iti barangay. # (Web In-Action)

SINUKAAN STALL, MAKATULONG A PAGBIAGAN

Cabugao, Ilocos Sur – Iti pannakiuman iti Web In-Action idi Nobiembre 25, 2014, imbatad ni Brgy. Captain Valentin S. Tuyor, Jr. ti Barangay Bonifacio  a napapintas  dagiti stall iti pagurayan ti lugan iti Kalsada Nasional a batog ti Cabugao South Central School babaen met laeng iti inisiatiba dagiti aglaklako ken ti barangay. Kalikagumanda a napintas a mabuybuya ti pakaipanan dagiti lakoda nga inaldaw tapno ad-adda pay a maatrakar dagiti aggatang/agbibiahe   malaksid ta naimas dagiti agduduma ti klasena  a makan a nakadiaya ditoy a pagtagilakuan.

Dagitoy nga aksion ken inisiatiba ket napundar babaen iti kooperasion dagiti aglaklako ken dagiti  Opisiales ti Brgy. Bonifacio ta malaksid nga agpaay a waiting shed dagitoy a puesto ket mangipaay met iti livelihood assistance kadagiti aglaklako ta manipud met laeng iti bigat agingga iti malem nga usarenda daytoy nga espasio, segun pay ken ni Kapitan Tuyor.# (Web In-Action)

REPAIR TI PASILIDAD TI DepED DISTRICT OFFICE, IGANNUAT TI FPTA

Cabugao, Ilocos Sur – Maar-aramid ita ti  pannakapapintas  ti Storeroom ti Cabugao DepED District  a masarakan iti Compound ti Cabugao South Central School, Brgy. Bonifacio, Cabugao, Ilocos Sur babaen iti pannakasemento/palitada/pannakapinta ti dibision/uneg   ti nasao a pasdek, pannakainstolar ti lababo, pannakaipan ti tiles iti basar ken iti  pannakaaramid ti bobedana. 

Daytoy a gannuat ket idadauluan ni Cabugao Federation PTA President Armando Azcueta babaen iti panangilungalong dagiti kameng ti  Cabugao Federated Parent-Teacher Association (FPTA).

Ti nadakamat nga Storeroom ket imatonan ni Mr. Edison Solatre, District Property Custodian ti Cabugao DepED District Office. # (Web In-Action) 

CLEAN-UP DRIVE, AGTULTULOY

Cabugao, Ilocos Sur – Agtultuloy a maigannuat ti panagdaldalus babaen iti panangiyusuat dagiti pannakabagi ti Clean and Green Program ti Munisipio nangruna ita ta mapaspasungadan ti iyaadani ti Paskua 2014 a panagsangpet pay dagiti Bakasionista, Balikbayan ken Turista ditoy ili a Cabugao, Ilocos Sur.

Segun ken ni MENRO Edgar S. Balangatan, AT, a malaksid kadagiti pasilidades  ti Munisipio a tamtamingenda, makikoordinarda kadagiti Opisiales ti Barangay a makabatog iti National Highway ken Processional Roads ti Poblasion  tapno ipaayda ti tulongda nga agdalus ken mang-dredge kadagiti dadduma nga drainage canal.

Innayon ni Mr. Balangatan a kako-koordinarda pay dagiti Opisiales ti Barangay kadagiti pito a Coastal Barangays iti agtultuloy a Coastal Clean-up tapno maisagana a nasayaat  para kadagiti pumasiar a Bisita wenno Turista nangruna iti umadani a Paskua 2014. 

Manamnama nga  iti napintas a kooperasion ken kammayet  dagiti pannakabagi ti LGU-Cabugao ken dagiti Opisiales ti Barangay a mangituyang kadagitoy a trabaho ket naballigi latta ti pagbanagan dagiti programa a mailunsad iti salinong ti Gobierno Lokal ti ili a Cabugao. # (Web In-Action)

SEMINAR TI 4 P’s KEN RIC, INESPONSORAN TI DTI KEN LGU

Cabugao, Ilocos Sur – Maangay ti tallo nga aldaw (November  24-26, 2014) a panagseminar dagiti kameng ti 4 P’s, Rural Improvement Club (RIC) manipud iti Brgy. Dardarat ken ti Brgy. Daclapan. Naangay ti seminar iti Covered Court and Multipurpose Building, Barangay Dardarat, Cabugao, Ilocos Sur.

Iti umuna nga aldaw, Nobiembre 24, 2014, naiyadal kadagiti nagpartisipar maipapan iti Good Manufacturing Practices babaen iti panagtinnulong da Dr. Gloria D. Tuzon ti Ilocos Sur Polytechnic College kas Trainor ken ni Mr. Yolando Q. Quiocho ti DTI, Vigan City a kas Facilitator. Maaramid ti Fish Processing Skills Training inton Nobiembre 25-26, 2014 ket pinunduan daytoy ti SMERA (Small & Micro Enterprise Roving Academy).

Manamnama a maited dagiti materiales nga usaren dagiti agseminar kas iti Meat Grinder, 2 Burner Gas Stove with LPG/Fittings, 2 Casserole Sets, 50 Pieces Aprons, 50 Pieces Hairnets, 1 Box Disposable Hand Gloves ken Kitchenware (Knives, Palayoks, Chopping Boards). # (Web In-Action)

PANAGDEKORAR PARA ITI PASKUA 2014, NARUGIAN

Cabugao, Ilocos Sur – Agtultuloy a maaramid  ti panagdaldalus/panangpapintas ti buya ti aglawlaw  babaen iti panangiyusuat dagiti pannakabagi ti ti Munisipio iti  iyaasideg ti Paskua 2014 a panagsangpet pay dagiti Bakasionista, Balikbayan ken Turista ditoy ili a Cabugao, Ilocos Sur.

Segun ken ni MENRO Edgar S. Balangatan, AT, kaduana da Mr. Richard Pula ken ni Mr. Donnell Peralta a mangtartarawidwid kadagiti LGU Personnel nga agtitinnulong ken agtultuloy  nga agdalus kadagiti pampubliko a disso kas iti Parke, Plaza, Government Center ken ti National/Provincial  Highway tapno agtultuloy a napintas ti buya ti aglawlaw.

Kabayatanna, naiplastaren ken maar-aramiden dagiti mayannatup a dekorasion para iti pannakaselebrar ti Paskua 2014 iti biang ti Munisipio kadagiti  umisu a pakaipananda kangrunaan iti ikub ti Municipal Garden iti  sango ti Munisipio (Presidencia) kasta metten kadagiti pagtaengan ken establisimiento ti negosio iti Poblasion.

Manamnama nga  iti napintas a kooperasion dagiti pannakabagi ti LGU-Cabugao a mangirugi a mangituyang kadagitoy a trabaho ket naballigi latta ti pagbanagan dagiti trabaho ken programa a mailunsad iti salinong ti Gobierno Lokal ti ili a Cabugao a para iti pannakaisagana dagiti pampubliko a pasilidades para iti selebrasion ti Paskua 2014. # (Web Situational Report)

CHAMPIONSHIP GAMES TI PRISAA UNIT MEET 2014, NAILEPPAS

Cabugao, Ilocos Sur – Agarup naggigiddan dagiti nayeskediul a salip/Games  dagiti Atleta kadagiti sumaganad nga events: Basketball, Table Tennis (B&G), Badminton (B&G), Soccer, Volleyball (B&G), Sepak Takraw, Athletics, iti Day 2 ti PRISAA Unit V Athletic Meet iti Nobiembre 21, 2014 a nagsisina a naaramid iti Cabugao District  Athletic Oval, Cabugao Institute Quadrangle ken iti  Cabugao Cultural and Sports Complex.

Segun ken ni Mr. Ronel M. Ubaldo, District PESS Coordinator nga inaramidda ti kabaelanda a nagmonitor iti pay-ayam iti dua nga aldaw, panangkita ti dadduma pay a kasapulan ken pakaseknan dagiti Atleta ken Bisita ken pannaki-koordinarda kadagiti nadumaduma nga event personnel ti PRISAA Meet a natudingan a mangkita iti pagan-annayasan ti pay-ayam ken dagiti nakipartisipar/nagbuya  kadaytoy.

Nakapundo latta met dagiti Ambulansia/Lugan  ti LGU-Cabugao a kadua dagiti mangimanmanehar dagiti nakadeploy a Nurses Aide ken MDRRMC Members  iti nadumaduma a paset ti pagay-ayaman a mangaksion iti aniaman a makasapul iti tulong ti First Aid ken Medikal iti pakaseknan kadagiti agdama a paay-ayamda.

Agtultuloy met a nakitinnarabay dagiti kameng ti Kapolisan, Blue Boys, ken  Barangay Tanod/BPATS  iti pannakamantener ti urnos ti Trapiko ken iti panag-ruar-sumrek ti lugan ken tao a mapan iti asideg ti pagbuyaanda. 

Kabayatanna, aktibo met a nakigamulo iti pay-ayam dagiti Officiating Officials ti DepED-Ilocos Sur a nangkita iti pannakatarawidwid dagiti major events a naaramid  iti game area.

Naregta met dagiti Announcer/Presentor iti School Stage iti Cabugao Institute  a mangipakpakaammo iti  pagdurdur-asan ti salip, panagsagana dagiti sumaruno nga agsalip a Cluster ken dagiti nangatiw a Team kalpasanna.

Buklen dagiti Officiating Officials ti Tournament Managers ken kakaduada iti benneg ti Elementaria ken High School     iti tunggal event.

Iti pannaki-amad ti Web In-Action kadagiti Tournament Managers ti dadduma nga Event iti Nobiembre 21, 2014, kinuna ni Mr. Pepe Adame, Tournament Manager ti Sepak Takraw a maiduma ti Cabugao District Athletic Oval ta malaksid a napintas ti buya ti pagay-ayaman ket naurnos ken mannakitinnulong ti Host Municipality ti Cabugao kadagiti delegasion a nakipartisipar iti kompetision.

“Very supportive ti LGU ken ni  Mayor ta naikkantayo ti napintas a pagay-ayaman. Talaga met nga sportsminded dagiti Opisiales ditoy ket agyamyamankami ta nupay addakami iti public schools ket nadutokankami nga  officiating official ti PRISAA Meet ket agkikitatayonto manen inton Provincial Meet,” imbatad met ni Mr. Francis Rabago, Tournament Manager ti Secondary Level.

“Awan ti makunamin. Very hospitable ken naragsakkayo a sinangbayanmi ditoy Cabugao, Apo!” insupusop met ni Mr. Hermogenes Escobar, Tournament Manager ti Basketball.

Manamnama nga iti nagmalem a pay-ayam iti Nobiembre 21, 2014 ket maam-ammuanen  dagiti agballigi a Cluster iti tunggal event kadaytoy a dinnayo ken dagiti mapili nga Atleta ken Coaches a makilaok iti masungad nga 2014 Ilocos Sur Division Sports Competition (Provincial Meet) iti masakupan ti Unit V inton Disiembre 1-5, 2014. # (Web In-Action)

EDUCATIONAL TOUR TI MFARMC, NABALLIGI

Cabugao, Ilocos Sur – Naaramid ti Educational Tour kadagiti  naballigi a disso ti  Fishery Projects ken Center kas iti Batangas Marine Protected Area, BFAR – Tanay Rizal ken ti BFAR –rMATdec, Lucap Alaminos City idi Nobiember 17-19, 2014.

Daytoy a Labay-Aral ket nagpartisiparan dagiti opisiales ti  Integrated Fisheries and Aquatic Resource Management Council ti Probinsia ti Ilocos Sur   ken inesponsoran ti Gobierno Probinsial, LGU’s  ken ti BFAR a nakaawisan met dagiti MFARMC Chairmen ti 30 a Coastal Municipalities a pakaibilangan ti ili a Cabugao, Ilocos Sur.

Segun ken ni Mrs. Milagros R. Paz, Municipal Fisheries Coordinator a nakipaset  iti Lakbay Aral  ket naballigi ti resulta daytoy nga aktibidadda ta nakitada dagiti kabaruanan a wagas iti panangpasayaat iti industria ti pagikanan nga iyallatiwda met nga ipadamag kadagiti asosasion ti mangngalap iti masakupanda nga ili.

Indauluan ni nag-Brgy. Captain Danny S. Garcia ti Barangay Dardarat, agdama a  Chairman ti  Integrated Fisheries and Aquatic Resource Management Council ti Probinsia ti Ilocos Sur   dagiti nag-lakbay aral nga MFARMC’s ken Fishery Coordinators iti nadakamat a dua nga aldaw nga Educational Tour.

Dagitoy nga aksion ken inisiatiba ket gubuay iti napintas a koordinasion ti BFAR, Gobierno Probinsial ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno manayonan ti maited a pagsayaatan ti sektor ti mangngalap babaen iti pannakaadaptar dagiti mayataday a Teknolohia iti pagikanan.  # (Web In-Action)

1st DAY TI PRISAA UNIT V ATHLETIC MEET, NAARAMID DAGITI GAMES

Cabugao, Ilocos Sur – Kalpasan nga ideklara ni Mr. Meneleo Palma, CSEE, EPS-MAPEH ti DepED-Ilocos Sur  iti pannakalukat ti pay-ayam ti 2014 PRISAA Unit V Athletic Meet  ket narugian dagiti nakaeskediul a panagsalip dagiti Atleta kadagiti sumaganad a major events: Basketball, Table Tennis, Lawn Tennis,   Badminton, Taekwondo, Volleyball (B&G), Sepak  Takraw, Track and Field, ken Javelin Throw.

Kabayatanna, aktibo met a nakigamulo iti pay-ayam dagiti Officiating Officials, Coaches, Atleta ti nadumaduma a Cluster a buklen  dagiti pageskuelaan-pribado ti Ilocos Sur.

Naregta met dagiti First Aide a buklen dagiti RN-Heals Nurses ti RHU-Cabugao, dagiti mangmanmanehar iti dua nga Ambulansia ti Munisipio,  MDRRMC Team nga idauluan ni Engr. Nestor B. Somera, Brgy. Tanod/BPATS-Bonifacio a nakadeploy iti game area.

Manamnama nga iti maikadua  nga aldaw, Nobiembre 21, 2014 ket maammuanen  dagiti nagballigi a Team iti tunggal event ken mangyalat iti Kampeonato kadaytoy a dinnayo.

Iti  Part 1V  ti Sports Competition ket maaramid dita ti Closing Program a pakaammuanto kadagiti nagballigi nga Atleta. # (Web In-Action) 

FAMILY DEVELOPMENT SESSION, NAKAPOKUS ITI PAGSAYAATAN TI 4 P’S

Cabugao, Ilocos Sur – Segun ken ni Municipal 4 P’s Focal Person Miss Aida S. Cueto, agtultuloy nga ipatungpalda dagiti programa ti 4 P’s a pagbulbuligan ti DSWD-MSWDO ken ti LGU-Cabugao nga ipatungpal kadagiti 33 a barangay ti ili a Cabugao, Ilocos Sur.

Iti bulan ti Nobiembre 2014, ileklektiurda maipapan iti Egg Syllabus (importansia iti panangtaraonda  iti ubing iti itlog) kadagiti iwayatda a Family Development Session (FDS) a  kagiddan ti Supplemental Feeding Program nga iwaywayat ti MSWDO.

Innayon ni Miss Cueto a kalaksidan ti material a pakabuklan ti programa ket maipamaysa met a mairagpin ti pakaseknan ti  espiritual a benneg ti panagbiagda tapno mabalanse ti panangsagrapda ti programa ket masustener ti panagbalinda a mapangnamnamaan ken responsable nga umili ti Cabugao, Ilocos Sur. 

Buklen dagiti mapan mangmitmiting kadagiti barangay dagiti Team nga idauluan da Miss Aida S. Cueto ken ni Ms.  Jessie Anne O. Tabut, Municipal Link-Cabugao. # (Web In-Action)

HOLY ROSARY, MINALEM A MAAR-ARAMID

Cabugao, Ilocos Sur –Naibatay iti Office Order No. 20, Series of 2013, sinaguday ti pammilin ni Mayor Edgardo “Ediboy” S. Cobangbang, Jr. iti panangited ti respeto ken importansia iti panangobserbar ti Tradision ti Simbaan Romano Katolika  ti bulan idi Oktubre 2013  a panangrugi ti inaldaw a panag-Santo Rosario dagiti Empleado/Department Heads ti LGU-Cabugao  babaen ti panangyuna ti Opisina ti Mayor agingga iti agdama.

Kanaig daytoy, binulan a maangay ti Nasantuan a Misa iti uneg ti Munisipio kas panangidur-as ti naespirituan a kasasaad ti tumunggal maysa ken iti institusion ti LGU-Cabugao.

Iti agdama, maang-angay ti Holy Rosary iti tunggal Alas Tres ti malem (3:00 pm) agingga iti Alas Kuatro  (4:00 pm)  iti Municipal Conference Building. 

Maidirehir daytoy a pammilin kadagiti amin nga LGU Officials, LGU Personnel ken agraman dagiti Job Orders (JO’s) ken Volunteers. # (Web In-Action)

PRISAA UNIT V ATHLETIC MEET 2014, HELD AT CABUGAO

Cabugao, Ilocos Sur - Participants from the different private schools of  Ilocos Sur arrived for the two-day sporting event: PRISAA UNIT V ATHLETIC MEET 2014, with a Theme: “ Fostering Excellence in Sports” today  November 20, 2014 at Cabugao, Ilocos Sur.

Subsequently, a  Parade was held around the town  that participated in by the Delegates and Sports Officials  including the Cabugao Institute Team hosting  the competition.

The Contested Events will be held at the Cabugao Institute and the Cabugao District Athletic Ground located at the Cabugao South Central School at Brgy. Bonifacio, Cabugao, Ilocos Sur. 

After the Parade, a short program was held at the CI Quadrangle. The Honorable Mayor Edgardo S. Cobangbang, Jr. gave his Message. He welcomed all Athletes and Delegates and expressed his wish that this two-day multi-sport competition  be successful.

He also stressed the importance of joining athletic games to develop the potentials of young individuals.

Mayor Ediboy received a Certificate of Appreciation for his invaluable support to the conduct of the competition. The Award was given by the PRISAA Meet 2014  Officials led by Miss Maria S. Rondon. 

The Presentation of Delegates per Cluster  and the  Raising and Hoisting of Banner of the five cluster that comprises the different private schools (Elementary and High School) was done   before  Rhea Jane Ancheta led the Oath of Sportsmanship and  followed by the Athlete’s Prayer  by Meynard Lance Cabanero.

After the Lighting of the Torch by student representative from each cluster, Mr. Meneleo Palma, GES 1, Division Sports Coordinator announced the Formal Declaration of the Unit Meet. Likewise, he received also a  Certificate of Appreciation. 

Miss Maria S. Rondon, CI Principal administered the Ceremonial Toss and  assisted by Cluster 1 & II Basketball Players.

Before the Game Proper started, Mr. Meneleo Palma witnessed the Reading of the House Rules and Guidelines of  Tournament Formats. # (Web In-Action)