Cabugao, Ilocos Sur – Impakaammo ti Luzon Green Art Technology, Inc., iti pribado a kompania a nangyimplimentar ti Privatization of Solid Waste Management para iti Munisipalidad ti Cabugao a naballigi dagiti naiwayatda nga addang a mangpasayaat ti koleksion ken panagaramidan ti organiko a ganagan babaen iti basura.
Sakbayna, naaramiden ti information-education ken communication kadagiti service barangays ket ditoy a pinasingkedanda ti pagannurotanda: “No Segregation, No Collection” Program.
Kanayon itoy ti pannakasanay dagiti mangipatungpal iti trabaho iti panagkolekta ti basura iti inaldaw, naiyusuat ti staff development tapno maingato ti working efficiency dagiti mangiggem iti opisinada, improvement of disposal facility ken on-site organic gardening a nayon nga obra dagiti obrerosda.
Kabayatanna, epektibo met ti operasion ti kabarbaro a Shredder Machine a nainayon a katulongan ti LGA Tech., Inc. iti pannakagiling dagiti biodegradable wastes.
Segun ken ni MENRO Edgar S. Balangatan, AT, a daytoy a ramit ket inted ti LGU-Cabugao tapno nadaras a maproseso dagiti maaramid nga Organiko a Ganagan a pagbalinan dagiti agrupsa a basura.
Kanaig daytoy, innayon ni Mr. Balangatan a makatulong ti dakkel dagitoy a maprobitsar a natural nga abuno iti pannakaitandudo ti Organic Agriculture ti Munisipalidad kas panangannurot iti Organic Agriculture Act nga ipatpatungpal dagiti LGU’s agsipud ta dagiti mannalon iti Cabugao iti maisagut kadaytoy a naaramid nga abuno iti Ecology Center.
Iti pannangted ti LGU-Cabugao iti pawayway nga agoperar ti LGA Tech., Inc. ket manamnama iti napintas a panagannayas ti trabahoda ket kaipapananna met iti naballigi a pannakaidalimanek ti basura a maurnong iti Ecology Center, impeksa pay ni MENRO Edgar S. Balangatan, AT. # (Web In-Action)
No comments:
Post a Comment