Cabugao, Ilocos Sur – Naballigi a naselebraran ti All Soul’s Day ken All Saint’s Day idi aldaw ti Nobiembre 1-2, 2014 ditoy ili ti Cabugao, Ilocos Sur.
Naitampok kadaytoy a dua nga aldaw (Sabado ken Domingo) iti panagmisa ti Kura Paroko iti Catholic Cemetery kasta metten iti Padi ti Philippine Independent Church (PIC) ket nawarisan ti bendision dagiti nitso ken tanem ken kasta met a napatulodan iti karkararag dagiti kararua dagiti minatay.
Imbatad ti maysa a nagbisita a nupay daytoy laeng ti kadakkelan a gundaway a surnadan ken makidanggay ti sapasap iti selebrasion, maipakita iti nasged a panangipateg dagiti nagminatay kadagiti minatayda babaen iti pannakaiparabaw dagiti agkakadaeg ken nabalor a sabsabong iti rabaw ti panteon ken nitso, pannakaidasar iti nadumaduma a kita ti taraon ken makan iti uluanan ken sakaanan dagiti panteon ken kasta metten iti nasged a darang dagiti kandela a naitugkel.
Nagpaut ti dua nga aldaw (Nobiembre 1-2) iti kaadu ti tao a nagsarungkar ken idadateng dagiti dadduma pay a bimmisita a naggapu iti nadumaduma a lugar tapno maikkanda ti panawen a mangkita ken manglagip kadagiti minatayda.
Kabayatanna, naregget ti kapolisan a nagbantay iti serkan, uneg ken rummuaran iti sementerio babaen iti panangidaulo da Chief of Police William N. Nerona ken ni Fire Marshall Elmer C. Acapuyan ti Bureau of Fire Protection (BFP)-Cabugao babaen iti “Oplan Kaluluwa” a programada agraman iti naanus a pannakitinnarabay dagiti Medical Personnel a nangbukel ti Medic/First Aid manipud iti RHU-MHO Cabugao.
Naanep dagiti Barangay Tanod/BPATS agraman dagiti Opisiales ti Barangay Bonifacio a nakitinnakunaynay kadagiti simmarungkar nga umili ken sangaili iti sementerio.
Iti pannakiuman ti Web In-Action iti Municipal Police Station-Cabugao, nairekord a natalna ken naballigi iti napasamak a panagselebrar dagiti umili babaen iti “Oplan Kaluluwa” ti PNP-Cabugao ita a Difuntorom 2014. # (Web In-Action)
No comments:
Post a Comment