Indagadag ni Vice Governor Deogracias Victor B. Savellano ti pannakapaadu dagiti kayo nga agpeggad a mapukaw iti Probinsia ti Ilocos Sur.
Kinuna ni Vice Gov. Savellano a mapukpukawen iti probinsia ti logo, anonang, bittaog, tiesa, kamantiris, makopa, ken dadduma pay a kadaanan a mula wenno kayo.
Maysa pay nga endangered a kayo a kayat ni Vice Gov. Savellano ti mapaadu ti sagat, maysa a kayo a natangtangken pay ngem narra a napintas nga aramiden a muebles.
Kinuna ni Savellano nga inanusanda a ginabut dagiti mula a sagat a nagrusing iti arubayan daytoy a kayo sada immula iti lote iti Barangay Pug-os.
Kinuna ti Bise Gobernador nga amin a kadaanan a mula a maalana, pinaimulana iti Barang-ay Demo Farm tapno makapataudda iti bukel a maiwaras a maimula iti Probinsia.
Innayon ni Savellano nga endangered species dagitoy a kayo ket no saan nga agtignay ti Gobierno Probinsial, naan-anayton a mapukawda dagitoy a klase ti mula a kayo. # (Adapted, Tawidnews)
No comments:
Post a Comment