Cabugao, Ilocos Sur – Naangay ti pannakabendision ken cutting of ribbon iti pannakaisibro ti Cabugao District Athletic Oval iti abagatan ti Cabugao South Central School, Brgy. Bonifacio, Cabugao, Ilocos Sur idi Nobiembre 3, 2014 a no sadino a ditoy ket dinar-ayan dagiti School Heads ti nadumaduma a pagadalan iti Cabugao DepED District, dagiti Kameng ken Opisiales ti Cabugao Federated PTA, Municipal Officials nga idauluan da Mayor Edgardo “Ediboy” S. Cobangbang, Jr. ken ni Vice Mayor DJ Savellano kasta metten dagiti Department Heads ken Empleado ti LGU-Cabugao, ken ti Opisial ti DepED Division Office.
Immuna a naangay ti Cutting of Ribbon ket timmulong da Mr. Meneleo Palma, CSEE, Division PESS Coordinator ken ni Mrs. Melvi S. Sajonia, Principal II, CSCS iti pannakagetteng ti laso iti pannakaisibro ti nasao a pasilidad.
Simmaruno ti panangidaulo ni Rev. Fr. Felix A. Costales, Kura Paroko, Cabugao Catholic Church iti panagkarkararag sa nabendisionan dagiti paset ti sports facility ket indauluan da Mayor Ediboy ken ni Vice Mayor DJ Savellano ti grupo a nangbayabay ken ni Fr. Costales a nanglikmut iti Oval.
Nangited ti Mensahe ni Mayor Ediboy. Pinadayawanna dagiti Mangisursuro ken dagiti FPTA Officials iti anepda a nakitinnulong kabayatan iti pannakaaramid ken pannakaisagana ti nasao a pasilidad para iti masungad a tallo nga aldaw a kompetision.
Simmaruno a naaramid ti lumba ti taray iti aglikmut ti Oval a nagpartisiparan ti pannakabagi ti LGU, DepED, ken ti FPTA. Immuna a simmangpet ni Mr. Edison Solatre a pannakabagi ti DepED.
Nagturong ti amin a dimmar-ay iti CSCS Social Hall para iti mapagsasanguan a naisagana iti dayta a gundaway. # (Web In-Action)
No comments:
Post a Comment