SOLIDARITY MEETING TI DepED, NAGSARITA NI MAYOR EDIBOY

Cabugao, Ilocos Sur – Naangay ti Solidarity Meeting dagiti  Officiating Officials ken Coaches iti uppat nga ili: Sinait, Cabugao, San Juan ken Magsingal maipapan iti maaramid iti tallo  nga aldaw (Nobiembre 5-7, 2014) a Unit Sports Competition Meet 2014 a no sadino a ditoy ket  ag-Host ti ili a Cabugao, Ilocos Sur ket naangay ti mitingda iti Social Hall, Cabugao South Central School, Brgy. Bonifacio, Cabugao, Ilocos Sur  idi Nobiembre 3, 2014.

Kalpasan ti panangited ni Mr. Meneleo Palma, CSEE, Division Sports Coordinator iti instruksion kadagiti kakaduada a mangtarawidwid iti Unit Meet ket nagsarita ni Mayor Edgardo “Ediboy” S. Cobangbang, Jr. iti imatang dagiti Opisiales ti Sports iti uppat nga ili a dimmar-ay iti miting.

Kimmablaaw ken nagyaman ti Ama ti Ili iti dinnanggay ken kinaurnos ti  kaaduan iti pannakaisagana iti  pakaangayan daytoy a pasalip ti DepED ita a tawen. Dinakamatna iti pannakaipasdek ti Cabugao District Athletic Oval a pangkomplementar ti Gobierno Lokal ken Probinsial iti programa ti Sports kadagii agad-adal tapno maipromot daytoy a tay-ak ti paglaingan a mainayon a manghulma kadagiti ubbing nga agbalin a nalaing nga agad-adal ken mapangnamnamaan nga umili iti masakbayan.

Innayon ni Mayor Ediboy a daytoy a proyekto ket kolektibo a nagbibinnadangan dagiti maseknan a sektor iti pageskuelaan kabayatan a  naipasdek ken naisagana para iti maangay a tallo nga aldaw a kompetision. Pagyamanan met ti Alkalde Munisipal iti maited a kapanunotan dagiti dimmar-ay iti mainayon a mangpasayaat pay iti naestablisaren  nga sports facility para kadagiti pageskuelaan ken agad-adal.

Kalpasan ti panagsarita ni Mayor Ediboy, naggrupo dagiti Opisiales ti Sports para kadagiti nadumaduma nga events a tarawidwidanda ken pinasiarda dagiti disso a pakaangayan dagiti event nga idauluanda. # (Web In-Action)