Wednesday, March 12, 2014

1ST DEVELOPMENT COUNCIL MEETING TI LGU CABUGAO, NAARAMID

Cabugao, Ilocos Sur – Naaramid ti 2014 1st Local Development Council Meeting ti LGU-Cabugao nga idauluan ni Mayor Edgardo “Ediboy” S. Cobangbang, Jr., LDC Chairman iti Marso 12, 2014 iti Municipal Conference Building, Cabugao, Ilocos Sur.

Nagatendar dagiti Kapitanes ti Barangay ti Munisipalidad, Non- Government Organizations (NGOs), Peoples Organization (POs), DepEd ken Farmers’  Association (FAs).
Immuna a naaramid ti Prayer babaen ken ni Mrs. Grenalyn Amoroso, Cabugao RIC Federation President. Simmaruno ti Turnover ti Report ken  Result of Soil Fertility Mapping Project ti LGU-Cabugao babaen ti panangyawat ni Ms. Eugenia Briones, Opisial ti Bureau of Soils and Water Management-Manila dagiti Fertility Guide Map ken Land Use Map  ken ni Mayor Ediboy a binayabay da SB Member Benedicto  M. Savellano, Committee Chair on Agriculture ken ni MPDC Florante S. Jara nga inimatangan  dagiti nagatendar iti miting.


Kalpasanna, inlawlawag ni SBM Savellano ti pakabuklan ti proyekto nga insayangkat ti LGU-Cabugao. Bininsana ti pateg daytoy a gapuanan ti Gobierno Lokal para iti manayon a pagimbagan dagiti mannalon ti Cabugao.

Kimmablaaw ken nagyaman met ni Mrs. Briones iti LGU Cabugao nga idauluan ni Mayor Ediboy ken iti pannakikaysa dagiti kaduada a nagipatungpal kadaytoy a proyekto kadagiti napananda a barangay.

Nagyaman met ni Mayor Ediboy iti naited kenkuana a gundaway nga agsarita. Innayon ti Ama ti Ili  a maysa daytoy a naisalumina a gapuanan ti LGU-Cabugao  agsipud ta daytoy pay laeng ti umuna a proyekto a naigannuat ti Bureau of Soils and Water Management (BSWM)  iti Probinsia ti Ilocos Sur no di pay ket iti intero a Rehion Uno. Pinagyamanan pay ti Ama ti Ili iti agtultuloy a panagtalek dagiti mannalon a mayoria nga umili ti Cabugao ket daytoy a proyekto ket adu ti maaramidanna a pagsayaatan dagiti umili ti Cabugao.


Naisaruno  ti maikadua a parte ti miting nga isu ti panangtarawidwid ni Mayor Ediboy iti mapagsasaritaan iti Development Council Meeting.

Bininsa ni Mayor Ediboy iti reportna dagiti kangrunaan a nagapuanan ti Administrasionna ket namnamaenna a babaen iti pannakikaysa dagiti nagatendar a mangiboses kadagiti plano ken kalikagumda iti sektorda a mairaman  ket nabungbunganto manen ti pagbanagan dagitoy a maisayangkat a pagdur-asan ti umili.


Kangrunaan nga impasagepsep ni Mayor Ediboy iti kaaduan a nangirepresentar kadagiti sektor ti umili iti pannakabenepisiar ti sapasap kadagiti proyekto, agtultuloy a napintas a pannakamanehar ti pundo ken maipatungpal dagiti rebbengna a mayun-una a kasapulan ti kaaduan.

Naisaganad ti panagreport ni Ms. Revelina Bayona, Vice President for Operations ti LGA Tech, Inc. a kadua ti LGU-Cabugao a mangmanmanehar ti Solid Waste Management Program ti Munisipio. Imbatad ni Ms. Bayona iti naannayas a panagkammayet ti LGU-Cabugao  ken ti kompaniada a mangipatungpal ti “No Segregation, No Collection” Policy.


Inlatak  met ni Mayor Ediboy ti pinsarna a pannakaipabaro ti Kontrata ti kompania gapu iti napintas a gapuananda. Kinuna ni Ms. Bayona a nakaraman ti planoda nga “expansion coverage” iti tallo pay a  kadagiti nangrugianda a barangay ti ili iti serbisioda iti pannakaidalimanek ti basura.

Sakbay a naaramid ti Open Forum, imbinsa ni Mayor Ediboy dagiti “Monumental” a gapuanan ti Gobierno Munisipal gapu iti nataliaw dagiti Ahensia a kangrunaan a nasayaat a naar-aramid ket dinakamatna dagiti sumaganad:

1.Pannakapadayaw ti LGU- Cabugao iti Seal of Good Housekeeping a nagtaudan ti premio a naiproyekto iti Barangay Pug-os.


2.Bottom-Up Budgeting (BUB) ket benepisiario ti LGU-Cabugao iti dua a 15 Milion nupay adda 2.6 Milion a Counterpart ti LGU-Cabugao.

3.1 Milion a Premio ti LGU-Cabugao,  nga inakuban ti Congressional Fund  iti maysa pay a Milion,   iti panangabakna iti Rice Achievers Award 2013 iti National Level.

4.Pannakaibaba ti Interest Rate ti utang ti Munisipio iti Land Bank of the Philippines (LBP).


5.Dinakamat pay ti Alkalde Munisipal iti naitultulong dagiti Barangay Tanods a Multiplier Force ti Kapolisan iti pannakatagiben ti agtultuloy a linak ken talna a paratignay ti agtultuloy a panagprogreso ti ili.

6.Pannakaipasdek dagiti Day Care Centers kadagiti barangay ta saanda laeng a makapaggigiddan.

7.Tinaming pay ti Ama ti Ili dagiti pakaseknan dagiti Kakabsat a Muslim nga aglaklako idiay NISTC Public Market.

8.Impaganetget pay ni Mayor Ediboy a pagkurrien dagiti Brgy. Captains dagiti Barangay Development Councils-da tapno naan-anay iti pannakaasikaso ti amin a mayun-una a mataming a proyekto ket dagiti dadakkel ti kasapulanna ket tumulong ti Munisipio a mangipagteng kadagiti rebbengna a makatulong iti pannakapundoda.


Taraudi a sarita ti Ama ti ili ti panangibagana a probitsaren koma dagiti sektor ken asosasion dagiti serbisio a magun-odda kadagiti maseknan nga Ahensia ken Opisina ken isarmingda kadagiti kabarangayanda dagiti kayat  ti Munisipio a mapasamak tapno adda met sanggirda a mangtunton pay kadagiti pagsayaatan a mangital-o ti kasasaad dagiti umili.

Intuloy da ABC President Brgy. Captain Thaddeus U. Soller ken ni MPDC Florante S. Jara ti nag-Preside iti Open Forum.
Nagsarita pay dagiti pannakangiwat dagiti dadduma nga asosasion ken Kapitanes ti barangay kadagiti kayatda a mairaman a maipatungpal.


Inggunamgunam ni ABC President Soller nga agaramid dagiti NGOs ti Feasibility Study kadagiti kalikagumda ket itedda iti Opisina ti MPDC ken ilista met dagiti dadduma a sektor dagiti kayatda a matun-oyan a proyekto ket maistudiarda  sakbay a mairamanda kadagiti maipatungpal a proyekto iti masanguanan. # (Web In-Action)

No comments:

Post a Comment