Friday, March 28, 2014

GRADUATION TI NORTH CENTRAL SCHOOL, NAISIBRO TI SCHOOL STAGE

Cabugao, Ilocos Sur – Naangay  ti Graduation Ceremonies ti Cabugao North Central School idi malem ti Marso 27, 2014 a nagpartisiparan ti 126 nga ubbing a naggradduar ti Elementaria, nagannak/guardians, mangisursuro,  PTA Officers ken bisita nga indauluan ni Mayor Edgardo “Ediboy” S. Cobangbang, Jr.

Nagpaay a Guest of Honor and Speaker ni Ms. Jennifer Lopez Bagaoisan, Empleado ti Light Railways Transport Authority (LRTA)-Pasay City.


Immuna a naaramid  ti Moments of Recognition iti agsapa ti Marso 27, 2014 a nakapadayawan dagiti ranking pupils  manipud iti Kindergarten agingga iti Grade V. Nagpaay a Guest Speaker ni Ms. Hazel S. Formoso, Registered Nurse, Class 2000 iti nasao a pagadalan.

Napnuan-kaipapanan ti pammagbaga ti Guest Speaker kadagiti naggraduar nga ubbing. Inladawanna ti pateg ti adal a kas naipangruna a ramit iti pananggun-od ti balligi ditoy a biag.


Iti pannakaited  dagiti Gold Medals, inyukkor ni Mayor Ediboy ti Balitok a Medalia kadagiti Honor Graduates ken Medal for the Best Achiever of the Year iti napagasatan  a nagturpos.

Simmaganad ti  pannakaibunong ti Certificates ket  kadua ni Mayor Ediboy da Mrs. Helen V. Siruno, Public Schools District Supervisor, ti Guest Speaker, Mrs. Estrellita M. Siruno, Principal II ken ni PTA President Maxfel S. Suboc  a nangiyawat kadagiti Certificates kadagiti naggraduar. 

Iti Mensahe ni Mrs. Helen V. Siruno, District Supervisor,  impeksana ti ragsakna a makaimatang iti pannakaisibro ti baro nga School Stage ti eskuela a nakaangayan ti Graduation Ceremonies. Pinagyamananna iti LGU-Cabugao nga idauluan ni Mayor Ediboy iti panangilungalongna  iti pannakaadda ti pageskuelaan ti kabukbukodanda  nga School Stage.



Pinalagipan ti District Supervisor dagiti nagannak nga itultuloyda koma a tarabayen dagiti annakda a nagturpos a mangituloy ti adalda iti nangatngato a tukad ta daytoy ti kapatgan a maipaay iti anak tapno pumintas ti masakbayanda.

Kalpasan iti pannakaaramid ti dadduma a parte ti programa ket nangipaay ni Mayor Ediboy iti Inspirational Message iti amin a nagatendar iti Graduation Ceremonies. Binigbig ti Ama ti Ili nga isu met ti agyaman ta nairana iti pannakaited kenkuana ti gundaway a mangidaulo ti ili iti pannakaadda ti School Stage a nabayagen a tinartarigagayan ti pageskuelaan a mapaadda. Nagyaman pay ti Town Chief Executive iti agtultuloy a talek ken pammati dagiti nagannak ken mangisursuro ket adu pay iti maited a pasilidad iti pagadalan agsipud ta ditoy ti sentro ti adu nga agpabasa nga aggapu iti kabangibang a barangay.


Insupusop ti Alkalde Munisipal iti maipapan iti Tema ti Graduation: “Hindi Natititinag ang Pusong Pilipino” ket kuna ni Mayor Ediboy a saan met nga agpatingga a mangpasayaat ti pageskuelaan  ti puso iti nasayaat nga Ilokano wenno Cabugaoenio.

Inted ni Mayor Ediboy ti Plake a pammadayaw iti kinalaing ni Christian Paul Lopez, Class Valedictorian 2014. Naipaayan met ti Ama ti Ili iti Pammadayaw a Plake (Citation) nga inted ti PTA-Cabugao  North Central School nga idauluan ni Mr. Maxfel S. Suboc ken iti DepED Cabugao District nga idauluan ni Mrs. Helen V. Siruno, Public Schools District Supervisor. Binayabay dagiti amin a mangisursuro ti Cabugao North Central School nga idauluan ni Mrs. Estrellita M. Siruno, Principal II iti pannakaiyawat ti Plake ken Pammadayaw ken ni Mayor Ediboy. # (Web In-Action)

No comments:

Post a Comment