Tuesday, March 4, 2014

INTER-LINK TI PROGRAMA TI DOH ITI LGUs

Cabugao, Ilocos Sur – Naaramid ti panaginspeksion ti Sanitation Inspector ti DOH-Region 1 itay nabiit kadagiti pageskuelaan ti Cabugao DepEd District tapno tingitingenda met no agtultuloy latta a maipatpatungpal ti epektibo a sanitasion iti amin nga aspeto iti pageskuelaan.

Kinadua ni Mrs. Jeanette Garcia, Sanitation Inspector ti RHU-Cabugao iti nasao a DOH Official a nagbisita kadagiti pageskuelaan. Malaksid iti sanitasion a tinamingda ket nairaman pay a naasikaso dagiti dadduma a pakaseknan ti dadduma a  pageskuelaan a kas iti pannakaisimpa ti Titulo ti nagsaadan dagiti lote ti eskuela ken panangkitada kadagiti pasdek (condemn status) a saanen a mabalin a pagbasaan dagiti ubbing ket mairekomendar a masukatan.

Segun ken ni Dr. Bernardino M. De Gracia, OIC Municipal Health Officer, LGU-Cabugao a mapasamak ti panagkikinnammayet ti dadduma nga Ahensia ti Gobierno kas iti DOH, DepED, DSWD kadagiti LGUs tapno naan-anay a maaksionan dagiti pakaseknan dagiti clienteles.

Kadagiti barbarangay, innayon ni Dr. De Gracia a maseknan ti DOH ken ti DSWD iti pannakaitandudo dagiti programada kas iti Kalusugan Pangkalahatan, Health Care  and Education Program ti 4 P’s Beneficiaries, Supplemental Feeding Program ti Day Care Children,  Operation Timbang ti Municipal Nutrition Committee ken iti  National Nutrition Council.

Insupusop ni Dr. De Gracia a babaen iti naan-anay a panagkakammayet dagiti Ahensia a maseknan iti pannakaidanon dagiti kasapulan a serbisio ket nadardaras a maaksionan dagiti pakaseknan dagiti umili iti benneg ti salun-at, edukasion, sanitasion ken nutrision kadagiti barangay. # (Web In-Action)

No comments:

Post a Comment