Cabugao, Ilocos Sur – Naangay ti Meeting ti Cabugao Federated Senior Citizens Association iti Senior Citizen’s Center, Brgy. Rizal, Cabugao, Ilocos Sur iti bigat ti Marso 24, 2014.
Sakbay a nairugi ti miting ket pinagtugawda iti sango dagiti agkasangay a nataengan ita a bulan ti Marso 2014 ket kinantaan ti kaaduan ida iti “Happy Birthday Song”.
Kangrunaan a natratar iti nasao a miting ket dagiti suumaganad:
1.Pannakipaset ti Senior Citizen iti parada inton Abril 24, 2014 a kaaldawan ti DepED ken iti Sektor ti Social Services kas iti benneg ti 4 Ps, People With Disabilities (PWDs) ken ti Senior Citizens.
2.Nataming dagiti dadduma a pakaseknan nangruna kadagiti eskediulda iti Prayer Service kadagiti natayan a kameng a pagatendaranda.
Naisaruno ti pannakailawlawag ni MSWD Officer Mrs. Lydia S. Gazmen iti pakabuklan ti “Annual Budget” ti Senior Citizens para iti 2014 kas iti sumaganad:
A.Social Pension (P90,000) a Counterpart ti LGU-Cabugao para iti 20 a Pensioners ti Senior Citizens.
B.MOOE (P100,000) ket nabingbingay para iti sumaganad: Travelling Expenses – P5,000; Supplies - P1,000; Information Education Campaign – P37,000; Sagot Ayat kada Lola ken Lola – P25,000; Skills Training – P14,000; ken OSCA Head (Honorarium)- P18,000.
Innayon ni Mrs. Gazmen a saan pay a naawat dagiti SC Pensioners ti awatenda iti 1st Quarter 2014 ta madama nga iberipikarda dagiti benepisiario iti resulta ti National Household Targeting System (NHTS) a kangrunaan a nagibasaranda iti 4 Ps no dagitoy a mapili iti benneg ti napanglaw a pamilia ket kaikarianda ti mairaman iti programa para iti napanglaw uray iti Social Pension.
Insupusop pay ni Mrs. Gazmen ti palagip ni Mr. Orencio Sadioa, Presidente ti Senior Citizen iti Brgy. Cael-layan a kasapulan nga alaenda ti gudua ti 1% a kaibatoganda iti Internal Revenue Allotment (IRA) a pundo iti barangayda tapno mainayon pay iti kasapulan ti asosasionda a nataengan iti lugarda. # (Web In-Action)
No comments:
Post a Comment