Cabugao, Ilocos Sur – Iti pannakiuman ti Web In-Action itay nabiit, imbatad ni Waterworks Superintendent Engr. Nestor B. Somera nga agtultuloy latta ti ipaayda a serbisio kadagiti umili nga end-users iti danum a mainum nga aggapu iti Magarang Water Springs, Brgy. Cacadiran, Cabugao, Ilocos Sur ken iti Roma-Kinalian Sources iti Brgy. Maradodon ken Brgy. Catucdaan kas panagsaganadda.
Kabayatanna, adda met latta dagiti service connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema iti transmission pipeline ken iti distribution pipeline. Ngem maaksionan daras ken madagdagus a matarimaan dagitoy.
Inulit ni Engr. Somera nga ikagkagumaananda nga aksionan dagiti awag dagiti water-users uray aldaw ti Sabado ken Domingo agsipud ta inaldaw a nakasapulan ti danum iti panagbiag dagiti umili kasta metten iti pakaseknan dagiti household waterlines.
Insupusop pay ti Waterworks Superintendent a madagdagus a mataming/masolbar ti pakaseknan dagiti water consumers agsipud ta kankanayon latta met ti panagrekurida/monitor dagiti Collectors, Pifefitters ken Personnel a masakupan ti Cabugao Waterworks System.
Inulit pay ni Engr. Somera a saan a maliklikan dagiti pagteng no agkiddit ti danum maigapu iti Climate Change ken kaadu ita ti bubon a pagpakunotan dagiti mannalon tapno masustener ti kasapulan dagiti naimulada ita a Dry Season 2014-2015. # (Web In-Action)
No comments:
Post a Comment