Cabugao, Ilocos Sur – Maibatay iti rekord ti DA-LGU Cabugao, naammuan nga 356 ti bilang ti mannalon a nagtalon kadagiti addaan ti pananumanna a masakupan ti irigasion iti Munisipalidad ti Cabugao iti Dry Season 2014-2015 (Nobiembre-Mayo).
Segun ken ni Mr. Nereo S. Daproza, AT, Municipal Rice Program Coordinator ken pammasingked ni Municipal Agriculturist Zenaida S. Andrada nga adda bilang ti 42 ektaria a natalon iti Hybrid Rice a sinukay ti 75 a mannalon; 155 ektaria ti Certified Seeds a tinalon ti 279 a mannalon.
Innayon ni Mr. Daproza nga adda met ti 3 (tallo) ektaria ti natalon iti Seed Production nga inasikaso ti 2 (dua) a Seed Growers iti dua a barangay. Umabot ti 200 ektaria ti dagup ti amin a natalon iti Irrigated, Dry Season 2014-2015, segun pay ken ni Mr. Daproza.
Agsipud ta madama pay laeng a maap-apit dagiti naimula a pagay ket saan pay a masinunuo no mano a sako wenno Tonelada ti kada ektaria ti maapit.
Nupay kasta, manamnama a napintas ti maapit iti agdama maigapu iti pabor ti panawen ken napintas ti pannakaisagana dagiti pagtatalonan iti tulong ti Mechanized Farming nga impaay ti DA ken ti LGU-Cabugao kasta metten kadagiti kabaruanan a Teknolohia ti panagpatanor ti pagay a maiyad-adal kadagiti mannalon, segun pay ken ni Mr. Daproza. # (Web In-Action)
No comments:
Post a Comment