Cabugao, Ilocos Sur – Naaramid ti Groundbreaking Ceremony iti maipatakder a 3-Storey Building ti Municipal Police Station iti amianan a paset ti NISTC Public Market, Brgy. Rizal, Cabugao, Ilocos Sur idi Pebrero 19, 2015 a nagatendaran dagiti Opisiales ti LGU-Cabugao nga idauluan da Mayor Edgardo “Ediboy” S. Cobangbang, Jr. ken ni Vice Mayor Deogracias Jose Victorino H. Savellano agraman dagiti kameng ti Konseho Munisipal nga isuda SBM Vicky S. Serna; SBM Dr. Jemaima S. Tan-Yee; SBM Benedicto M. Savellano; SBM Atty. Bryann Jett S. Pano; SBM Josefina S. Vallejo; Opisiales a pannakabagi ti PNP-Region 1 ken Provincial Office-Ilocos Sur ken PNP-Cabugao nga idauluan ni Police Chief Inspector William N. Nerona ken iti Bureau of Fire and Protection (BFP) nga idauluan ni Fire Marshal Elmer C. Acapuyan. Kasta met dagiti LGU Personnel a timmulong a nagisagana kadagiti masapsapul ken nangpasangbay kadagiti nagsangpet a bisita.
Immuna a naaramid ti Prayer and Blessing babaen ti panangidaulo iti panagkararag ni Rev. Fr. Felix A. Costales ken binendisionanna ti plano ken time capsule iti panagbangon.
Nagpaay a Guest of Honor ni Mayor Ediboy ken kaduana dagiti Opisiales ti Gobierno Munisipal a nangbayabay kenkuana iti panangisulbong/pannakagabor ti Time Capsule iti pannakaipatakder ti nasao a pasdek iti imatang dagiti nagatendar.
Kalpasanna, immallatiw dagiti nagatendar ket naaramid ti ababa a programa iti asideg ti pakaipasdekan ti Police Station Building.
Iti Mensahe ni Mayor Ediboy, kimmablaaw ken nagyaman kadagiti Opisiales ti PNP Local, Provincial ken Regional Office ken kasta metten kadagiti kamkameng ti Konseho Munisipal ta nakagasgasat ti ili a Cabugao babaen iti tulong ken suporta nga ipapaay ti Philippine National Police.
Bininsa ti Ama ti Ili iti pateg ti partnership ti LGU, PNP ken BFP nga adda iti salinong ti DILG ken iti panagbinnadangda iti implementasion kadagiti programa ti PNP ditoy Cabugao ket imbilangna dagitoy a bendision a maaw-awat ti ili ken agbalin nga ehemplo kadagiti amin nga ili ti Ilocos Sur.
Innayon pay ni Mayor Ediboy a dinakamat iti pakasaritaan iti masukatan a pasdek ti Municipal Police Station ken maipasdek ti baro ditoy Tiendaan ken dua pay a PNP Substation kadagiti estratehiko a disso iti Poblasion.
Pinagyamanan pay ti Alkalde Munisipal ti Konseho Munisipal ti ili nga idauluan ni Vice Mayor DJ Savellano iti pannakaipaay ti counterpart ti Munisipio iti maipatakder a baro a PNP Police Station.
Iti biang ti PNP, pinagyamanan ni Police Superintendent David D. Mariano, Deputy Director ti Ilocos Sur Provincial Police Office (ISPPO) iti panangited ti Munisipio ti Cabugao iti pagdissuan ti baro a pagyanan dagiti polis ti ili kasta met iti counterpart ti LGU iti pannakaipatakder daytoy a pasdek. Imbatad ni Deputy Provincial Director a tuloytuloy ti tulong nga itdenda iti kapolisan ket sumarsaruno a maited ti police mobile car. Nabara ti kablaaw ti Opisial ti PNP iti amin nga Opisiales Lokal ti ili nga idauluan ni Mayor Ediboy.
Nakikaysa met iti seremonia da People Law Enforcement Board (PLEB) Chairman Mr. Jeremy S. Seguban ti ili a Cabugao, PCI Desierto ti ISPPO; PCI Christopher Rebujio ken PCI George Marca iti Police Regional Office 1 ken ni ABC President Brgy. Captain Thaddeus U. Soller.
Nagpaay nga Emcee da PO2 Nazette A. Ibe ken ni NCIP Walter John S. Esteban. # (Web In-Action)
No comments:
Post a Comment