Friday, February 27, 2015

OPERATION TIMBANG KEN CENSUS, MAIPATPATUNGPAL

Cabugao, Ilocos Sur – Agtultuloy latta a maar-aramid ti “Operation Timbang” ken Census  babaen kadagiti Barangay Nutrition Scholars (BNS)  ken dagiti Barangay Health Workers (BHW) iti 33 a barangay ti ili a Cabugao, Ilocos Sur ita a bulbulan, segun ken ni Mrs. Joenah G. Sevilleja, AT, Municipal Nutrition Action Officer.

Dagiti maserbisyuan nga ubbing ket manipud iti agtawen ti 0-71 months a maaramid iti semi-annual ken 0-23 months a binulan a maaramid agraman kadagiti “underweight children”  nangruna iti barangay  tapno madeterminar no maibagay met  laeng iti agdama a pagbasaran ken pagrukodan ti  kasasaad ti ubing iti tawenna. 

Innayon ni Mrs. Sevilleja nga agtinnulong  dagiti BNS ken ti BHW’s  a mangsarungkar iti pagnaedan dagiti ubbing a timbangenda. Kasta met a maitarapnos pay iti Update ti Family Profile (Census) ti pamilia ti ubing. Kaaduan a sangapulo a Pamilia ti magapuananda iti agmalem iti dayta a barangay ket ituloydanto manen iti sumaruno nga aldaw ti obrada.

Ti regular a panagkalap ti datos dagiti ubbing ket kasapulan a ma-update ta  pagbasaran iti mabukel a mainayon a  programa ti Nutrision ken kasapulan unay iti report-da iti benneg ti Munisipal ken Probinsial, segun ken ni Mrs. Sevilleja.

Dagitoy nga aksion ken inisiatiba ket paset iti naregget a pannakaipatungpal ti programa ti Nutrision babaen iti agtultuloy a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web Situational Report)

No comments:

Post a Comment