NAKAMULAN TI BUNGRO FARMERS ITI PROYEKTODA A MAIS

Cabugao, Ilocos Sur – Inleppas dagiti kameng ti  Bungro Farmers Association nga idauluan ni Mr. Edy L. Sevilleja  nga immula ti bukel a hybrid a mais (Dekalb) iti lima-ektaria a taltalon iti Nobiembre 1, 2012. Rinugianda ti nagmula idi Oktubre 30, 2012 (tallo nga aldaw a nagmulada).

Daytoy a mulada ket pakabuklan ti proyekto a nagun-odda iti DA-RFU 1, OPAG Ilocos Sur ken LGU Cabugao nga idauluan ni Mayor Edgardo “Ediboy” S. Cobangbang, Jr. Ti nagan ti proyekto ket Rice-Based Farming Systems in Lowland Areas on Region 1 a nangrugi ita a  Tawen 2012 ken agpatingga inton Tawen 2015. Kaduada a nakagun-od daytoy a proyekto iti Pug-os FA ket maruk-atan ti P150,000 a pakabuklan ti proyekto ti kada tawen mangrugi iti 2012.

“Kayatmi nga agballigi daytoy umuna a rubuatmi tapno agkalikagumkami manen ti dakdakkel iti sumaruno. Iyallatiwmi met daytoy a proyekto iti sabali a barangay,” imbatad ni Mr. Edy L. Sevilleja, Presidente idi kauman ti Web In-Action idiay kataltalonan a pagmulmulaanda iti Nobiembre 1, 2012.

“Pagyamananmi unay ken ni Mayor Ediboy ta nakaprayoridad  ti programa ti LGU iti Agriculture Sector ken ti nakaysa a pannakigamulo dagiti Ahensia a kadua ti LGU a nangibaklay ti mausar iti  proyekto. Kadakami a Farmers, ulitek a kunaen: paneknekanmi a kabaelanmi ken agballigikami. “No pain, no gain…!” innayon ni President Edy.

Kalpasan ti panagmulada, impalgak ni President Edy nga angayenda ti panagselebrar ken salu-salo iti asosasionda kas pangpatibker ken panggunggonada ti kinatimpuyogda. # (Web In-Action)

CLEAN AND GREEN PERSONNEL, TIMMULONGDA ITI DIFUNTUROM

Cabugao, Ilocos Sur – Nagkaykaysa dagiti Personnel ti LGU Cabugao a mangbukel ti Clean and Green Program nga idauluan da MENRO Edgar S. Balangatan ken Mr. Richard Pula a nangiplastar kadagiti kasapulan kas iti tugaw, lamisaan, signboards ken kaarngina a kasapulan iti pannakaselebrar ti Difunturom (Nobiembre 1-2, 2012) kadagiti matatao a lugar kas iti dua a lokasion ti Kamposanto: Municipal Cemetery ken Cabugao Public Cemetery.

Imbatad ni MENRO Balangatan a tinawen nga ar-aramidenda dagitoy nga aktibidades ket nasapsapa ita ti panagisaganada kadagiti kasapulan nangruna iti pannakadalus ti agsumbangir ti National Highway manipud Brgy. Sagayaden agingga iti Barangay Pug-os kasta met kadagiti amin a pampubliko a pasilidades a papanan dagiti bisita, sangaili ken bakasionista.

Innayon ni Balangatan nga agtultuloy ken epektibo nga ipatungpalda ti direktiba ti Alkalde Munisipal iti pannakadalus,  pannakaisagana ken pannakaidalimanek dagiti ramit ken alikamen ti Munisipio sakbay ken kalpasan dagiti maaramid a dadakkel nga aktibidad. # (Web In-Action)   

TALLO TI AWARDEES TI CABUGAO ITI GAWAD SAKA WINNERS

Cabugao, Ilocos Sur -  Nagatendar dagiti nangabak ti Regional Gawad Saka Winners and Nominees agraman dagiti Talent Scouts iti biang ti ili a Cabugao iti naaramid a Regional Gawad Saka Awarding Ceremony iti Outstanding Achievers in Agriculture and Fisheries iti  Nueva Segovia Consortium of Cooperative  (NSCC) Plaza, Caoayan, Ilocos Sur idi Oktubre 30, 2012.

Dagiti tallo a Gawad Saka Winners ti Provincial Level ti  Cabugao ket isuda: Turod Patac Brgy. Captain Edgardo Sonido, Outstanding Integrated Rice-Based Farming System; Mr. Elpidio Mejia, Outstanding Small Animal Raiser; Mrs. Joenah G. Sevilleja, Outstanding Agricultural Extension Worker (AEW).

Dagiti sumaganad a Provincial Winners ket agbalinda a Regional Nominees iti nadakamat a Kategoria ti pagsasalipan, segun iti pakaammo ni Provincial Agriculturist Teofilo R. Quintal ken ni Mayor Edgardo “Ediboy” S. Cobangbang, Jr. ti ili a Cabugao.

Pinagyamanan met dagiti nangabak dagiti nagpaay a Talent Scouts-da agraman  ti DA-LGU, ti Provincial Agriculture Office ken ti LGU-Cabugao a nangipaay ti agtultuloy a  suporta kadagiti  inggannuatda nga aktibidades a nagballigianda.

Nangpadaeg iti nasao a pasamak iti panangimatang da Ilocos Sur Gov. Luis "Chavit" Singson ken ni DA OIC Regional Executive Director Valentino C. Perdido, Ph. D. iti DA-RFU 1. Binayabay met da Vice Mayor Danny Q. Gazmen ken OIC Nereo S. Daproza, DA-LGU Cabugao ken kakaduana  dagiti tallo nga Agriculture Achievers  a Taga-Cabugao. # (Web In-Action) 

SEEDLINGS TI NATENG, INWARAS TI MSWDO KADAGITI 4 P’S

Cabugao, Ilocos Sur – Naaramid ti Distribution ti Vegetable seedlings babaen kadagiti pannakabagi ti Municipal Social Welfare and Development Office (MSWDO) ti ili a Cabugao babaen ti panangidaulo ni MSWD Officer Mrs. Lydia S. Gazmen  iti umabot  iti 359 a Pamilia  a 4 P’s Beneficiaries iti Brgy. Namruangan, Sabang, Daclapan ken Dardarat idi Oktubre 29, 2012.

Imbatad ni Miss Aida Cueto, pannakabagi ti MSWDO, a ti pannakaiwaras dagiti seedlings ket paset ti mainayon a panangtulong kadagiti nadakamat a pamilia kas napagnanamingan  iti Family Development Session (FDS) a naigannuat kadakuada maipapan iti Intensive Bio-Gardening idi bulan ti Setiembre 2012.

Dagiti klase ti seedlings a naited ket iti tarong, kamatis, tabungaw, karabasa, kabatiti ken paria. Dagitoy a tulong ket naggapu iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mailungalong ti panagmula iti arubayan iti nateng a makatulong a mangnayon ti kasapulan dagiti umili nangruna kadagiti barangay.  # (Web In-Action)

TRICK OR TREAT, INWAYAT TI STAC-CABUGAO

Cabugao, Ilocos Sur – Naaramid ti Trick or Treat kadagiti kliente nga ubbing ti Stimulation Therapeutic  Activity Center-(STAC)-Cabugao  ket nagpasiarda iti Poblasion babaen ti panangbayabay dagiti Personnel ti STAC Office ken nagannak kas paset ti panangselebrarda ti Halloween Activity para iti selebrasion ti Todos Los Santos (Nobiembre 1-2, 2012).

Iti Oktubre 30, 2012, nagturong ti grupoda  iti Munisipio ket binisitada ni Mayor Edgardo "Ediboy" S. Cobangbang,Jr. ken nakigrupoda para iti piktorial iti Ama ti ili. Napan pay ti grupo iti SB-ABC Hall ket  nakikaysa da SB Member Dr. Carlito S. Pano, SB Member Vicky S. Serna ken ABC President Teddy U. Soller iti panangkablaawda kadagiti dimteng a sangaili nga ubbing ken nataengan  ket timmulongda a nagiwaras ti kendi ken dadduma pay a naisagut kadagiti ubbing.

Daytoy nga aktibidad ket paset ti programa ti STAC-Cabugao a mangnayon ti “exposure”  kadagiti ubbing nga adda an-annayenna tapno manayonan ti panagtalekda iti bagida  ken kabaelanda. # (Web In-Action)   

PANAGDALUS ITI MUNICIPAL CEMETERY, NAIYUSUAT

Cabugao, Ilocos Sur – Tapno maipaay ti tulong kadagiti maseknan a tattao/pamilia  nga adda minatayna  iti Municipal Cemetery, Sitio Benneg, Barangay Cuancabal, Cabugao,Ilocos Sur, naiyusuat ti pannakadalus ti Kamposanto babaen kadagiti Job Orders nga agob-obra iti Munisipio ti Cabugao, Ilocos Sur idi Oktubre 29, 2012.

Naaramid ti general cleaning iti las-ud ken igid ti Kamposanto babaen ti panangidaulo ti grupo dagiti nagdalus ni Mr. Richard Pula,  pannakabagi  ti LGU-Cabugao ken  manarawidwid kadagiti trabahador ti Clean and Green Program ti Munisipio.

Iti pannakiuman ti Web In-Action, imbatad ni Mr. Pula nga aganay a dua nga aldaw ngata a dalusanda iti nabengbeng  a ruot ti kamposanto tapno nawadwada a pagnaan  dagiti adda minatayna a bumisita kadagiti nitso ken tanem  iti masungad a Piesta ti Sasantos ken Minatay (Difuntorom)  inton Nobiembre 1-2, 2012 a tinawen a maselselebraran iti intero a pagilian.

Daytoy nga aktibidad ket paset ti agtultuloy a programa ti Clean and Green ti Munisipio kadagiti pampubliko a lugar ken paguurnongan ti tattao tapno mamantener ti kinadalus ken kinapintas a buyaen ti sapasap. # (Web In-Action)

GRAND OPENING TI 2 BROTHERS GROCERY, NASANGAILI NI MAYOR EDIBOY

Cabugao, Ilocos Sur – Naaramid ti Grand Opening ti Two Brothers Grocery, Cabugao Branch idi Oktubre 28, 2012 a no sadino a ditoy ket inimatangan ti adu a bilang ti  umili ti Cabugao ken  iti  kabangibang a lugar iti kabarbaro a pasdek  ti dakkel a Groseria iti dumna ti National Highway, amianan a kabatog  ti NISTC-Public Market, Cabugao, Ilocos Sur.

Nasapa a naaramid ti Motorcade babaen ti Management ti Grocery iti Cabugao-Magsingal via Sinait a rota a binayabay dagiti siklista ken nadumaduma ti klasena a lugan.

Naaramid  ti pannakakartib ti ribbon iti pannakaisibro ken pannakalukat ti nasao a pasdek-pagtagilakuan babaen ken ni Mayor Edgardo “Ediboy” S. Cobangbang, Jr. a kaduana  ni Mrs. Jerlie S. Cobangbang a kapisi ti pusona. Kadua pay  ni Mayor Ediboy ti nasao a seremonia    da Vice Mayor Danny Q. Gazmen, MSWD Officer Mrs. Lydia S. Gazmen,  Municipal Treasurer Lourdes Azcueta,  Mr. Jeremy S. Seguban, Former SB Member Carlos Sison ken Mr. Dante Naval, Municipal Meat Inspector  ken dadduma pay a sangaili agraman dagiti akinkukua  ti Groseria.

Binendisionan ni Rev. Fr. Jeric Jaramillo, Kura Paroko ti Iglesia Romano Katolika iti pannakalukat  ti nasao a Pasdek-pagtagilakuan. # (Web In-Action)

5 EKTARIA A PAGMULAAN TI PUG-OS FARMERS, NARUGIANEN

Cabugao, Ilocos Sur – Babaen ti nagkammayet a programa ti DA RFU 1, LGU-Cabugao ken Pug-os Farmers Association,  narugianen a namulaan ti requirement a 5 Hectares rainfed area kadagiti agduduma ti klasena a nateng ken adda pay mais ken bawang a mainayon a maimula  ita a Dry Season Crop  (Oktubre 2012-Mayo 2013) iti proyekto a Rice-Based Farming Systems in a Lowland Areas in Region 1.

Nangrugi ti Proyekto iti Tawen 2012 ken agpatingga inton tawen 2015.

Segun ken ni Mr. Obas Bill Y. Baclig, AT/Supervising AT a kastoy ti nakabingayan ti namulaan a 5 ektaria a masarakan iti Brgy. Pug-os: 3 ektaria-Dekalb Corn Variety; 1  ektaria-bawang (Ilocos White Variety); ½  ektaria (Tomato hybrid); ken ½ ektaria (Pepper hybrid).

Iti pannakiuman ti Web In-Action, impeksa dagiti mannalon iti Barangay Pug-os  ti panagyamanda iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken mangnamnamada a  a babaen ti pannakaadaptar  kadagiti kabaruanan a teknolohia/wagas  ti panagmula/panagpatanor ti nateng, mais ken bawang ket maingatoda ti matgedanda ken maisungsongda dagiti padada a mannalon iti kabangibang a lugar a tumulad iti panagbuelo ti Sektor-Agrikultura ditoy a deppaar ti ili a Cabugao. # (Web In-Action) 

3RD DAY TI YOUTH CAMP, YAMAN KEN BALLIGI

Cabugao, Ilocos Sur – Naaramid ti 3rd Day (maudi nga aldaw) ti 1st Provincial Leadership and Livelihood Training and Seminar  iti Stella Maris Resort, Brgy. Pug-os, Cabugao, Ilocos Sur idi Oktubre 27, 2012.

Iti karabiyan ti Oktubre 26, 2012, nakiandingay  da Vice Gov. Deogracias Victor B. Savellano ken ATI Regional Director 1  Rogelio C. Evangelista iti  naaramid a Candle Lighting, Fellowship Night ti 4-H Club.

Kaaldawan ti Oktubre 26, 2012, naaramid ti panagdalus iti uneg ti Stella Maris Resort babaen kadagiti 4-H’ers  sa nag-tour dagiti delegado iti Munisipalidad.    Naaramid ti ababa a programa ket naipaay  ti Doxology babaen iti Sinait 4-H’ers. Ditoy a nagsarita ni Brgy. Captain Arnold “Bambi” Yangat ket binigbigna ti pannakaidayaw ti barangay ken ti ili a nakaaramidan daytoy a dakkel nga aktibidad ti agtutubo. Nagyaman ti Kapitan iti amin a nakigamulo kadaytoy nga aktibidad.

Napadayawan dagiti nangabak a Mr. & Miss Provincial 4-H Camp nga inabak ti Cabugao ken Sto. Domingo kas panagsaganadda. Inabak met ti Sinait 4-H’ers  iti  Miss Gay Provincial 4-H Camp.

Kalpasan ti pannakaited ti nagduduma nga impressions/makuna dagiti pannakabagi dagiti   ili a nagatendar, impaay ni Mr. Ruel Gambua, Provincial 4-H Club Federated  President ti Summary of the Event a nangibagaanna a naballigi ken pinagyamananda iti amin a nakigamulo nangruna iti ili ti Cabugao a nag-Host itoy a Youth Camp.   # (Web In-Action)