SUSIK ITI PAGREBBENGAN TI DAGA, NARISUT ITI TULONG NI MAYOR EDIBOY

Cabugao, Ilocos Sur – No manon a dekada ti napalabas  a parikut ti relasion iti nagbaetan dagiti  agindeg/agsuksukay  iti daga ken ni Mr. Lucresio “Lucky” Sajor, landowner,  iti Brgy. Bato, Cabugao, Ilocos Sur. Nupay kasta,  nasolusionan met laengen babaen iti na-imdiplomasiaan a panagsasarita ti agsumbangir a partido iti imatang dagiti dadaulo ti Opisina  ti LGU-Cabugao a  pakairamanan ti DAR-MARO ken pannakitarabay ni Mayor Edgardo “Ediboy” S. Cobangbang, Jr. iti Oktubre 24, 2012 iti mismo nga Opisina ni Mayor Ediboy.

Babaen iti pahina ti papel a nakailanadan dagiti napagpapatangan ti pannakarisut ti parikut maipapan iti nadakamat a daga iti Department of Agrarian Reform Adjudication Board,  napasingkedan iti imatang ni Mayor Ediboy iti panagpinnirma dagiti agsumbangir a partido iti katulagan tapno naan-anayen ti panagkikinnaawatanda a maseknan  iti maipatungpal a katulagan.

“Nairana  ti  batangtayo nga agserbi ti pannakaasikaso ken pannakasolbar daytoy a problemada. Naikari a datayo ti mangtarabay a makarisut daytoy a gidiat dagiti agsumbangir a partido. Ket gapu iti pammati ken talekyo a nangisadag kadakami ti pannakasolbar ti problemayo, kunaek a   maymaysa ti ili a Cabugao a pagnaedantayo. Agsisinnakittayo ket ikarigatanmi met nga ipaay ken iserbi ti aniaman a pagkasapulan iti pannakapasayaat ti Barangay Bato ken agindeg ditoy,” impeksa ni Mayor Ediboy iti sanguanan ti 24 a maseknan a bumarangay nga idauluan ni Brgy. Captain Santos Aquino, Jr. ti Barangay Bato.

Kadua ni Mayor Ediboy a naitaripnong iti nasao a panagpipinnirma ti katulagan iti Opisinana  da Chief of Police William N.  Nerona, MLGO Officer Connie L. Quinola, MARO Caretaker Elizabeth S. Pablico ken kaduana ti opisina, ti anak ken manugang ni Mr. Lucky Sajor a nangsaksi ti panagpirma dagiti 24 a maseknan/makitaltalon  nga agindeg iti Barangay Bato.

“Agyamankami unay ken ni Mayor Ediboy gapu iti napnuan respeto a panangibilangmi ken  dagiti katalonanmi a makikaysa a mangpatalged ti katulaganmi tapno masurotanmi ti naurnos a panaglalangen para iti masakbayan ti pamiliami ken iti komunidad a pagnaedanmi,” kinuna ni Brgy. Captain Santos Aquino, Jr. idi amaden ti Web In-Action ti kapanunotanna kadaytoy a narisutda  nga agkakatalonan. # (Web In-Action)