Wednesday, October 10, 2012

LAUNCHING PROGRAM TI ALS-LSCS, NAIWAYAT

Cabugao, Ilocos Sur – Naiwayat ti pannakailunsad ti Alternative Learning System (ALS)-LSCS kadagiti  26 a  babbai a  naggapu iti nadumaduma a barangay ti ili a kaaduanna ti agbanbantay ti agbasbasa nga anakda iti Cabugao South Central School.

Paset ti programa ti ALS ti tumulong kadagiti sektor nangruna ti babbai nga agtarigagay a maaddaan ti skills training a mabalinda nga isapul a mangtulong ti kasasaad ti panagbiagda. 


Dinakamat ni Mr. Nestor de los Santos,  DALSC, a Cosmetology ken Hair Dressing ti adalen dagitoy a 26 nga inna. Innayonna a kasapulan a malpasda ti 150 oras ti kursoda  ket 3 oras ti naituding a panagsursuroda ti inaldaw. Patauden ti ALS Program dagiti kasapulanda babaen ti panagkammayet ti DepEd Cabugao District ken Gobierno Munisipal nga idauluan ni Mayor Edgardo “Ediboy” S. Cobangbang, Jr.

Panglukat a kararag ti inaramid ni Mr. Warren Sumibcay, Mobile Teacher, National Anthem ni Mrs. Perla Sajonia, Teacher III. Pammasangbay a balikas ti binagi ni Brgy. Captain Valentin S. Tuyor, Jr. agsipud ta maaramid ti panagsanay iti pasilidad ti Brgy. Bonifacio.


Nagbalin a Resource Speaker/Trainor  ni Ms. Imelda Siruno Carbonel, balikbayan, ket impaagsepna ti pateg ti maaddaan ti kabaelan kadagiti ababa a kurso a mabalin a pagbiagan. Kinaritna dagiti trainees nga agkaykaysada nga agsursuro ta didanto pagbabawyan ti resultana. 

Iti mensahe ni Public Schools District Supevisor Helen V. Siruno, dinayawna ti testimonia ni Ms. Carbonel tapno mapakarit dagiti agsanay. Innayonna a saan laeng nga iti pormal a panagadal ti ipampamaysa ti DepEd ita no di pay iti Non-Formal a napateg a makatulong iti sapasap.

Kimmablaaw ken nagyaman ni Mayor Ediboy kadagiti amin a naitallaong. Binigbigna ti napintas a timpuyog dagiti agsanay a mangbirok ti kaipapanan dagiti kabaelanda tapno makatulongda iti pamiliada ken iti kagimongan. Innayon ti Ama ti Ili a patgen koma dagiti agsanay ti maited nga adal ken mausar iti panagadalda ket agbalin koma nga ulidan ti sapasap daytoy a gannuat. Dinayawna dagiti mangisursuro a mangiturturong ti programa ti ALS.

Closing Remarks ti impaay ni Ms. Melvi S. Siababa, Principal II ti Cabugao South CS. Nagyaman ken ni Mayor Ediboy ti nasged a suportana kadagiti programa ti DepEd a pakabenepisiaran ti sapasap. # (Web In-Action)


No comments:

Post a Comment