Monday, October 15, 2012

INTRAMURALS 2012, NANGORONA NI MAYOR EDIBOY

Cabugao, Ilocos Sur – Naangay ti Mister and Miss Intramurals 2012 iti Cabugao National High School, Brgy. Turod, Cabugao, Ilocos  Sur  idi  Oktubre 12, 2012 a nagpartisiparan dagiti agad-adal ken  mangisursuro  nga idauluan ni Mrs. Felipa B. Asuncion, Principal kasta met dagiti naisangayan a nagatendar nga idauluan ni Mayor Edgardo “Ediboy” S. Cobangbang, Jr. 

Tinawen a mapasamak daytoy nga aktibidad ti pagadalan a pangipakatan dagiti agad-adal kadagiti kabaelanda iti maipapan iti kultura, talento   agraman iti sports tapno naan-anay a mamulida iti kinadisiplina ken mapadur-as ti  kabaelanda.

Naipabuya dagiti intermission numbers dagiti estudiante a nangparagsak iti programa.

Nangpadaeg iti programa ti panangisaad   da Mayor Edgardo “Ediboy” S. Cobangbang, Jr. ti korona ti Mister Intramurals 2012 a kaduana ni SB Member Josefina S. Vallejo. Kasta met a kinapareha ti Alkalde Munisipal ni SB Member  Dr. Jemaima S. Tan-Yee pannakaipan ti korona ti Miss Intramurals 2012.


Naikkanda met  ti parte iti programa da SB Member Dr.  Carlito S. Pano ken Brgy. Captain Inocencio S. Sadac ti Barangay Turod a nakikaysa met kadaytoy a programa ti pagadalan.

Iti mensahe ni Mayor Ediboy, kinablaawan ken inapresiarna ti natunos/naisalumina  a pannakaiparang dagiti mabuya a pangrambak daytoy a tinawen nga aktibidad ti pagadalan. Innayonna a napateg dagitoy nga aramid kalaksidan ti akademiko  a pakatubayan ti kabaelan a makilangen ken pakasursuruan ti nasayaat/natibker nga ugali a tagipatgen ti paggargarawan a pagadalan ken  komunidad.

Impeksa met ni Mrs. Felipa B. Asuncion, Principal ti panagyamanna iti Ama ti Ili ken kadagiti babaenna ti  agtultuloy a pannakidanggayda iti maaramid a programa iti eskuelada. Innayonna pay  a pagyamananda ti agtultuloy a suporta ti Gobierno Munisipal kadagiti mailungalong a  pakaseknanda  iti pannakapasayaat ti  pagadalan. # (Web In-Action)

No comments:

Post a Comment