Thursday, October 11, 2012

CABUGAO FARMERS, NAKI-DIALOG ITI OPISIAL TI DA-RFU 1

Cabugao, Ilocos Sur – Naaramid ti dialog iti nagbaetan dagiti lideres ti mannalon iti nadumaduma a barangay  ti ili a Cabugao ken ni HVCDP (High Value  Crops Development Program)  Regional Coordinator Angel Padilla ti DA-RFU 1 iti Opisina ni Mayor Edgardo S. Cobangbang, Jr. idi Oktubre 10, 2012.

Kangrunaan a trinatar ni Padilla ti programa ti HVCDP maipapan iti panagmula cash crops kas ti bawang. Dinakamatna pay ti paset ti programa iti HVCDP iti   pakaseknan ti pannakagun-od kadagiti makinaria kas iti traktor, lugan ken kuliglig dagiti asosasion. Imbatadna a maiyun-una met la  a maaprobaran ken maikkan dagiti immuna  a nagkiddaw (First Come, First Serve Basis).


Adu ti magun-od dagiti mannalon a pagsayaatan nga itden ti programa nga iggemna iti DA ket  impaganetget ni Padilla a kasapulan laeng ti  napintas ti kasasaad ti asosasionda nangruna iti pinansial nga aspeto tapno natalgedda nga agkiddaw ken manamnama a mapatgan ti kalikagumda.
Binayabay ni Mayor Ediboy dagiti mannalon a  nakisarsarita ken ni Mr. Padilla. Pinatibker ti Alkalde dagiti mannalon nga itultuloyda ti agganetget agsipud ta ibilbilangna a “First Class Citizen” dagiti mannalon ket agtultuloy a kitkitaen ti Gobierno Munisipal kadagiti addang ken wayat a mangpasayaat pay ti kasasaadda.

Napagkaykaysaan dagiti mannalon nga ilistada dagiti kasapulanda ket katinnulongda ti DA-LGU ken ti Federated Farmers Association  nga agaramid ti papeles iti pannakaidur-as dagiti kalikagumanda a kiddawen iti Ahensia ti DA. # (Web In-Action)


No comments:

Post a Comment