FIELD DAY AND GRADUATION TI MANNALON ITI BRGY. PUG-OS

Cabugao, Ilocos Sur – Naangay ti Field Day and Graduation ti Season-Long Farmers Field School (Wet Season)-Kasakalikasan, IPM-Rice ti 30 a nagadal a mannalon a naggapu iti Barangay Pug-os, Nagsantaan ken Maradodon iti Oktubre 17, 2012 iti Open Auditorium, Barangay Pug-os, Cabugao, Ilocos Sur.

Daytoy a panagadal ket inesponsoran ti Dapartment of Agriculture-RFU 1, OPAG-Ilocos Sur, Agricultural Training Institute (ATI) ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. ken panangipatungpal ti DA-LGU a tarawidwidan ni OIC Nereo Somera Daproza, AT/Municipal Rice Program Coordinator.

Pammasangbay a balikas ti inakem ni Brgy. Captain Arnold “Bambi” Yangat ti Brgy. Pug-os. Pinagyamananna iti DA ken LGU kadaytoy a nagun-od dagiti mannalon.

Iti mensahe ni SB Member Benedicto M. Savellano, Committee Chair on Agriculture iti SB ken nangirepresentar ken ni Mayor Ediboy, kimmablaaw kadagiti nagturpos, opisiales ken lumugar ti Barangay Pug-os. Dinakamatna ti pateg ti panangarakup ti agtultuloy a panagbaliw ti Teknolohia iti panagmula ti pagay. Naibagana pay  ti panggep ti Ama ti Ili a pannakaipakat iti mabiit  ti Soil Fertility Mapping a maysa a kapatgan iti panagmulaan dagiti mannalon  iti Munisipalidad ti Cabugao.

Kalpasan ti intermission number dagiti nagturpos, napusgan ni Mr. Bert Vicente a nangipresentar ti pakabuklan ti datos ti naaramid a panagadal (aktual ken teoria).

Kinompirma  ni Mr. Ernesto de Fiesta, Training Specialist II, ATI-RTC 01, Batac Satellite Center, Batac City dagiti nagturpos ket ni met SB Member Savellano ti nangibagi  ken ni Mayor Ediboy iti pannakaakseptarda a naggraduar iti nasao a kurso ti 30 a mannalon.

Iti mensahe ni Mrs. Wilma Ibea, Sr. Agriculturist ken Assistant Provincial Chief, DA Provincial Center, Batac City, Ilocos Norte, pinadayawanna ti probinsia ti Ilocos Sur partikular ti ili a Cabugao nga umdasen   ti pagtaraon a bagas. Nupay kasta, innayonna a naaramid daytoy a panagadal tapno mapaadu pay ti apit ta dakkel ti epektona ti Climate Change iti panagbaba ti maapit.  Babaen iti   eco-friendly a sistema ken wagas  ti  teknolohia a maipakat,  basbassit  ti  magastos dagiti mannalon ket masulnitan daytoy a pagbabaan ti maapit.   

Naaramid ti Awarding of Certificates and Recognition of Oustanding Performance nga indauluan ni Mr. Henry Saliganan a kalaingan kadagiti nagturpos.

Nagatendar met ken nagsarita ni Mr. Oscar Tobia, pannakabagi ni Provincial Agriculturist Teofilo Quintal kasta met da Ms. Sinforosa R. Natividad, Liaison Officer, DA Provincial Center, Batac City, Ms. Remedios Inovejas, Facilitator ti FFS, OPAG Iliocos Sur, MAFC Chairman Kagawad Rogelio Barlolong, Mr. Robert Savella, Ms. Katryn Tapuro, Mrs. Ester Aguimbag ken Mrs. Marjorie Castillo, agpapada a taga-DA-LGU  kasta pay  dagiti nagbuya a lumugar ken Opisiales  ti Barangay Pug-os. Sinerraan ni Mr. Obas Bill Y. Baclig, AT ti DA_LGU ti programa. Nagpaay nga Emcee da Mr. Joel Baclig, Mr. Elmer Bromeo ken Mrs. Joenah Sevilleja.  # (Web In-Action)