Monday, October 15, 2012

LIPIT ELEMENTARY SCHOOL, TEDDEK TI EDUKASION TI DUMAYA

Cabugao, Ilocos Sur – Maysa kadagiti kaunaan a nabangon a pageskuelaan iti dumaya a paset ti Munisipalidad ti Cabugao, Ilocos Sur ti Lipit-Cuancabal Elementary School a nagsaad iti napantok a disso ti Barangay Lipit, Cabugao, Ilocos Sur.

Segun ken ni Mr. Edwin C. Duque, Head Teacher III, a tinaginayonda ti napateg a mision/akem  ti pagadalan a mangitultuloy ti pannakaisaknap/pannakagun-od  ti ubbing iti nakalidad nga   edukasion agraman kadagiti agnaed iti  kabangibang a barangay ta masasao a pannakasentrona   ditoy  a  nagsaadan pay ita   ti eskuela-sekundaria:  ti Lipit National High School.

Imbatad ni Mr. Duque a nataginayon met  ti napintas a linnangen ti ubbing, mangisursuro, nagannak, opisiales ken lumugar isu a nakalidad  ti pataudenna nga adal ken tagipatgen a galad a makipagili ken ti pannakamantener/pannakanayon  dagiti pasilidades ti eskuela.


Iti pannakiuman ti Web In-Action, intunda ni Mr. Duque ti disso iti ayan ti  proyekto a nalawa a  pavement iti sanguanan ti School Stage nga inted ti LGU Cabugao agraman ti movable bleachers iti panangilungalong/panangipaay ti Gobierno Munisipal nga idauluan   ni Mayor Edgardo “Ediboy” S. Cobangbang, Jr. Manamnama pay ti sumarsaruno a maitulong iti pannakatarimaan dagiti dadduma a pasdek a dumaanen iti kabayagdan a patakder.

Naaramid met ti perimeter fence a ginastuan ti 20% Development Fund ti Barangay Cuancabal nga idauluan ni Brgy. Captain Rogelio S. Siruno. Maipamaysa latta  a maaladan/makompleto  ti kongkreto a  lakub ti eskuela babaen ti tulong ti Konseho ti Barangay Lipit, pundo nga aggapu iti DepEd ken dadduma pay nga Ahensia.

Ti Lipit ES ket nagpadasanna metten ti nagab-abak dagiti ubbing-da  iti pakontes ti akademiko, sports, extra-curricular activities ken dadduma pay a pakasagatan ti pannakaideliber ti nakalidad nga adal iti napalabas, ket maitultuloy latta iti  agdama ken iti  sumaruno a tawtawen. # (Web In-Action)

No comments:

Post a Comment